भांगरभूंय | प्रतिनिधी
भायल्यांक कोण तरी आयलो आनी आमकां पात्रांव म्हणलें काय आमी खूश. बिराडांक दवरप आनी तांकां घरातले कशी वागणूक दिवप. मागीर तेच चल्ले आमचे गळे कापून.
पेडणेंकारांनो, आतां स्वताक सांबाळात. हें तुमचें पयलींचें तुमी समजतालें तें पेडणें उरूंक ना. बिगर गोंयकार जे पेडण्यां येवन रावल्यात तांचो पेडणेंकारांक अलर्ट, अशें पेडणेकारांनी समजून घेवचें. आयतारा दाडाची वाडी- धारगळे पयली हिट अॅण्ड रन म्हूण दुबाव आशिल्ली केश शेवटाक खुनाची म्हुण उक्तडार आयली. जर थळाव्यां टॅक्सीकारांनी नेट धरून नाशिल्लो जाल्यार घडये ती हिट अॅण्ड रन अशेंच समजून पुलिसूय कितें करचे नासले. पूण लोक एकठांय आयले उपरांत ताचो खोलायन तपास करचोच पडलो. तातून थळाव्या टॅक्सीकारांनी जबाबदारी घेतली. हातूल्यांन आतां पेडणेंकारांनी कितें देख घेवची तें म्हत्वाचें.
मोपा उपरांत पेडण्याचो धडाधड विकास जातलो, अशें तेन्ना राजकारणी सांगताले. तो नेमको कसो आनी कितें ते मात कोणेंच सांगूक नासलें. पूण जावं आतां तो बदल आनी तो विकास जाणवता हें मात खरें. तो विकास कसलो काय? तो विकास म्हळ्ळ्यार पेडणेकारांनी आतां जागें जावचें पडटलें. आमचें पेडण्यां, आमच्या गांवांत आमकां जाय तें चलपाक जाय. आमी आमच्या गांवांत दादा. हे दीस आतां उरले नात. पेडणेंकारांचे ते दीस सोंपले. विकास करून सगलें बदलपाची आमकांच खोशी आसली, मागीर आतां भोगतात. तशेंय आमी गोंयकार ओर्राद न्हय? आतां आमी काम बी करचे नात. चार रुम काडप, कोणाक तरी बिराडाक दवरप आनी घरा बसून पयसो करप… हीं सपनां आमी पळोवपाक लागल्यात. आनी त्या कर्माचीं फळां भोगपाचे दीस आतां आयल्यात. ही तर फकत सुरवात, आजून खूप कितें जावपाचें आसा. ताच्या खातीर पेडणेंकारांक आतांच मनाची तयारी करून रावचें पडटलें.
भायल्यांक कोण तरी आयलो आनी आमकां पात्रांव म्हणलें काय आमी खूश. बिराडांक दवरप आनी तांकां घरातले कशी वागणूक दिवप. मागीर तेच चल्ले आमचे गळे कापून. बारीकश्या कारणाक लागून झगडीं जातात आनी फाटलाव करून खून करता… म्हळ्ळ्यार ह्या कामगारांची कापाझदाद पळयात. गोंयकारांक हें डॅरिंग जावपाचें काय? अजिबात ना. पुण बिराडाक रावपी हे कामगार, मोपाचेर कामांक आशिल्ले अशी म्हायती मेळटा. मोपा उपरांत हो एक विकास आनी बदल म्हूण आतां मानून घेवचो पडटलो. खून करप आनी बिराडाक येवन सुशेगाद न्हिदप म्हळ्ळ्यार जालें कितें? गोंयकारांक मातूय कोताक धरनात काय किते हे, असो प्रस्न पडल्यार आतां कोणूय आमकांच मुर्ख म्हणपाचो. कारण प्रस्न विचारपाचे ते दीस आतां आनीक उरूंक नात. पयश्याचे आशेक बिराडांक दवरतात तें बरें आसा, पुण तांचें ‘टॅनंट व्हेरिफिकेशन’ तरी करचें ही जबाबदारी जर आमी स्वताचेर घेवपाक शकनात जाल्यार हे आमकां अशेच मारून वचपाचे.
मोपा विमानतळा उपरांत पेडण्यांतल्या गांवांनी मूळ पेडणेकार कमी आनी हे बिराडाक रावपी चड जाल्यात. काय दिसांनी हांची दादागिरी इतली वाडटली की आमकां घर हांकां विकून खंय तरी दुसरे कडेन वचून रावचें पडटलें, अशें दिसता. कोणा वांगडा वायट जावचें अशें आमका अजिबात दिसना, पुण जर आतांच जागे जाले नात जाल्यार आमकां भाडे दिवपी लोक फाल्यां कसले गुन्यांव करपाक शकतात ताचो विचार पसून करप शक्य ना. आमी पंच वेंचून दिल्यांत तांकां जाल्यार कांयच पडिल्लें ना. हें अशेंच चलपाचें, आजकाल दुसऱ्या खातीर झगडपी कोणूच उरिल्ले नात. आपल्या भुरग्यांचो फुडार आपणेंच चिंतचो पडटलो. हो एक खून जालो, ताका पुलिसांनी धरले. आतां विशय सोंपलो अशें जायना. ह्यान फुडें अशें घडचें न्ही, ताच्या खातीर कोणें कितें पावला उखल्ल्यांत. ताची जाप कोणेंतरी दिवची पडटली.
पेडण्यां आतां तीन पुलीस स्टेशना जाल्यांत. पयलीं एकाच पुलीस स्टेशनाचेर ताण येतालो. ती परिस्थिती आतां ना. बेस्टी सिंगमगिरी करून जावपाचें ना. ती सिंगमगिरी कामांतल्यान दाखोवची पडटली. मोपा वेळार आंदोलनां जाताली तेन्ना ह्या पुलीस अधिकाऱ्यांची सिंगमगिरी पेडणेंकारांनी पळयल्या. आता ती खंय गेली काय? खरें मळ्ळ्यार दुबावितांक पुलिसांनी सोदपाक जाय आशिल्ले, मात तें काम थळाव्या टॅक्सीकारांक करचें पडलें. जावं प्रत्येकान अशी जबाबदारी घेतल्यार प्रशासन बरे तरेन चलपाचें हातूत दुबाव ना. पुण हें आतां इतल्यार थांबपाचें ना, पुलिसांनी खर कारवाय करून अशें जे कोण कामगार मोपाचेर कामाक आसात तांचो वेगळोच डाटा तयार करचो पडटलो. आनी ह्या कामाक पुलिसांक थळाव्या पंचायतींनी तेंको दिवचो पडटलो. आपल्या लोकांक सांबाळपाची जबाबदारी प्रत्येकान घेवचीच पडटली.
ज्ञानेश्वर वरक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
