भांगरभूंय | प्रतिनिधी
देशांतले दोन व्हडले स्टार्टअप पेटीएम आनी बायजूस सध्या संकश्टाक तोंड दितात. ह्या कंपनींची स्थिती मतींत घेतल्यार तातूंत काम करपी हजारांनी कर्मचारी आतां हेर कडेन नोकऱ्यो सोदतात.
‘एक्सफेन्सो’ ह्या जॉब पोर्टलान जायत्या लोकप्रीय जॉब पोर्टलांची आंकडेवारी एकठांय केल्या. ते प्रमाण सध्या वयल्या दोनूय कंपनींच्या सुमार 13,500 कर्मचाऱ्यांनी ह्या जॉब पोर्टलांचेर नोंदणी केल्या. तातूंत पेटीएमचे 6,500 कर्मचारी आनी बायजूसचे 7,000 कर्मचारी आसात. म्हयन्या आदीं बायजूसाचे 2 ते 3 हजार नोकरी सोदपी आशिल्ले. पूण फाटल्या दोन सप्तकांत हो आंकडो तिपेट जाला.
पोर्टलाच्या म्हणण्या प्रमाण, सध्या दोनूय कंपनींतले तीन चतुर्थांश कर्मचारी वर्साक 5- 10 लाख रुपयांच्या सेलरी ब्रॅकेटांत नोकरी सोदतात. बायजूसांतल्या ६५% आनी पेटीएमच्या ४२% नोकरी सोदप्यांक चार वर्सां परस उणो अणभव आसा. फाटल्या कांय वर्सांत कर्मचारी कपात आनी नोकरी सोडिल्ल्यान बायजूसांतल्या कर्मचाऱ्यांचो आंकडो नेटान उणो जायत आसा. मे २०२३ मेरेन बायजूसांत फकत सुमार २०- २२ हजार कर्मचारी उरिले, जाल्यार मार्च २०२२ वर्सा तांचे कामगार ५८ हजारां वयर आशिल्ले. सध्या पेटीएमांत सुमार 15 हजार कर्मचारी काम करतात.
ईडी चवकशीक लागून पेटीएम कंपनीचे उपकंपनी पेटीएम पेमेंट्स बँके वयलीं संकश्ट वाडल्यात. ताजे म्हायती प्रमाण ईडीन कंपनीच्या परकी वेव्हाराची चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
