भांगरभूंय | प्रतिनिधी
फोंडें: पेटके-धारबांदोड्यां सोमारा सकाळीं सुमार ८.१५ वरांचेर राष्ट्रीय मार्गार आचकीत आयिल्ल्या गव्याक दुचाकीचो धपको बशिल्ल्यान दुचाकी चलोवपी जखमी जालो. जखमी जाल्ल्या चालकाचेर पिळयें मुळाव्या भलायकी केंद्रांत उपचार करून ताका घरा धाडलो.
मजगतीं, ह्या वाठारांत राष्ट्रीय महामार्गाचेर गवे येत आशिल्ल्यान चालकांक सुचवण्यो दिवपी तकटे रान खात्यान लावचे अशी मागणी वाहन चालक करतात.
मेळिल्ले म्हायती प्रमाण, सोमारा सकाळीं उसगांवच्यान मोल्यां वतना पेटक्यां अचकीत रस्त्याचेर गवो आयलो. दुचाकी चालकाक ताचे पसून स्वताक वाटवपाची संदूच मेळूंक ना. स्कुटरीचो धपको गव्याक बशिल्ल्यान चालक जखमी जालो. जखमीक पिळयें भलायकी केंद्रांत उपचार करून घरा धाडलो. हे विशीं पुलिशेंत कागाळ केल्या. गव्याक धपको दिल्ल्या मोटार सायकलीचें बरेंच लुकसाण जालां. गवो धपको बसतकच पळून गेलो.
पेटके राष्ट्रीय महामार्गाचेर अचकीत गवे आयिल्ल्यान अदीं मदीं दुचाकी चालक पडून जखमी जातात. वाहन चालकांक सादूर करपा खातीर रस्त्याचे दोनूय वटेन तकटे लावपाची मागणी वाहन चालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
