भांगरभूंय | प्रतिनिधी
फातोड्डेंच्या स्विमींग पुलाचेर पेंवपाचे प्रशिक्षण वर्ग खूब वर्सां उपरांत सुरू जाल्यात. तातूंत प्रवेश घेवपाक लोकांनी एकूच गर्दी केल्ली. फांतोडेर साडेचार वरांचेर पसून रांको लागिल्ल्यो. ही खबर व्यायामा विशीं जागृत आशिल्ल्या नागरिकांक खोसदिणी अशी. कारण आयज व्यायाम करपी तरणाटे जीम सोडल्यार हेर कडेन सहसा गर्दी करीनात. घरचे घरा वा मेकळ्या मैदानाचेर व्यायाम करपी तशे कमीच म्हणल्यार जाता. भरपूर फी दिवन गाडी वा दुचाकी घेवन व्यायामाक वचपी बरेचशे सरभोंवतणी दिसतात. तातूंतय बी भलायकेची समस्या निर्माण जातकच व्यायाम करपाक वचपी चड. तें कितेंय आसलें तरी प्रत्येकान दर दिसा अर्द वर तरी व्यायाम करपाक जाय. निदान वेगान चलपाक जाय, अशें जाणकार सांगतात. दरदिसा चुकनासतना चलप, जाॅगिंग करप असले सादे व्यायाम करप्यांचीय भलायकी तंदुरुस्त उरता. ते खातीर वजनां, वजें उखलपाकूच जाय, अशें ना. बाॅडीबिल्डिंग, पेलवान, वेट लिफ्टींग मळाचेर वचप्यांनी मात जिमांत खर व्यायाम करपाक जाय. तोय प्रशिक्षकाच्या मार्गदर्शना खाला. नेमान. व्यायाम करप्याचो आहार आनी जिणेशैली मात सारकी जाय. हें व्यायामा परस चड म्हत्वाचें.
पेंवपाच्या व्यायामाचे फायदे खूब. लोकांक हाची जाणीव आसा, देखून तांणी फातोड्ड्यां गर्दी केल्ली. पेंवप हो सर्वांगाचो व्यायाम. तकले पसून पांयां मेरेन सगले कुडीक पेंवतकच बरो व्यायाम जाता. कारण पेंवतना सगलें आंग, अर्थांत स्नायू हालतात. काळजाचे ठोके सारके पडटात. ताका लागून मनाचेर आशिल्लो ताण आपशीच ना जाता. काळजाचे स्नायू, मांसपेशी, हेर स्नायू सारके उरतात. शक्त वाडटा. वजन प्रमाणांत उरता. काळीज आनी पुलमांवां बरीं उरतात. पेंवन जालें कांय मनात शांतीकाय मेळटा. उमेदशी येता. लवचिकताय वाडटा. ल्हान घावे, स्नायू मुरगळप, दुखापत जावप असलें जायना. जालेंच जाल्यार उण्या प्रमाणांत. गरमेच्या दिसांनी थंड, शीतळ उदकांत न्हाल्यार जिवाक काय बरें दिसता, तें आमी सांगपाची गरज ना. मार्च, एप्रील, मे म्हयन्यांत तळीं, दर्यावेळो, न्हंयांचेर ओगीच लोक गर्दी करीनात.
फातोड्डेंचो स्विमींग पूल कोवीड धामी उपरांत परतून सुरू जाला. तीन वर्सां उपरांत. हांगा गोंय खेळां प्राधिकरणा वतीन पेंवपाचें प्रशिक्षण दितात. भुरग्यांक आनी जाण्ट्यांकूय. दर म्हयन्याक चार बॅच आसतले. सध्या प्रवेश सुरू आसा तो मे म्हयन्यांतल्या बॅचां खातीर. एप्रीलाची बॅच रोखडीच भरली. शाळांक सुटी पडिल्ल्यान बरो प्रतिसाद मेळ्ळो अशें अधिकाऱ्याचें म्हणणें. आसत. पूण, पेंवपाचें आकर्शण भुरग्यांक पयलीं सावन आसा. सुटी पडली काय न्हंयांचेर पेंवपाक गर्दी जाताली. डबे, मोटारीच्या टायराचे ट्यूब फाटीक बांदून वा जाण्ट्यांचे मजतीन भुरगे पेंवपाक शिकताले. सुटयेंत मामागेर वतकच हें प्रशिक्षण चुकच नाशिल्लें. आतां मामागेर वचपूच उणें जालां. कारण शिबिरां, खाशेले वर्ग, ट्यूशनां वाडल्यांत. कांय विद्यार्थी तर मे म्हयन्यांत फुडले यत्तेचो अभ्यास सुरू करतात. जमाना बदल गया है. दुसरें कितें म्हणपाचें? सरकाराचे मालकेचे स्विमींग पूल बऱ्याच जाग्यांचेर आसात. ते दुरुस्त करून थंय प्रशिक्षक नेमून पेंवपाचे वर्ग सुरू करूं येतात. जंय ते नात, थंय सुरू करचे. सरकारी शाळांक मैदानां, इनडोर स्टेडियम जाय. तशेंच एक स्विमींग पूल. फुडल्या काळांत हें करूं येता. खाजगी शाळांनी पेंवपाची सुविधा आसता. फक्त पेंवप न्हय, तर पेंवपाचे सर्तींत, तोय बी राज्य पांवड्या वयले सर्तींत वांटो घेवपा इतलो भुरगो फिशाल जातलो, इतलें तरी ताका प्रशिक्षण मेळपाक जाय.
गांवांनी तळीं, न्हंयो आसात. थंय थळाव्या क्लबांनी पेंवपाचे शास्त्रोक्त वर्ग घेवं येतात. ते खातीर गांवांतल्या पीटी शिक्षकान फुडाकार घेतलो जाल्यार गांवांतल्या भुरग्यांक शारांनी स्विमींग पुलांचेर वचपाची गरजूच पडची ना. शारांतल्या स्विमींग पुलां वयलो ताणूय उणो जातलो. पेंवपा सारकी एक कला शिकिल्ल्यान त्या भुरग्यांचें व्यक्तीमत्व सुदारतलें. आत्मविस्वास वाडटलो. कोणे सांगचें हे कलेचो फुडाराक तांचे जिणेंत फायदोय जावं येता. पेंवपाच्या मळाचेर राष्ट्रीय पांवड्याचेर गोंयाक खूब कितें करपाची संद आसा. हे प्रशिक्षण वर्ग ती दिवंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
