भांगरभूंय | प्रतिनिधी
पेडणें: केरी दर्यादेगे वयल्या दोंगराचेर बेकायदो पॅराग्लायडींग करतना पर्यटक शिवानी दाभळे (27) आनी पॅराग्लायडींग पायलट सुमन नेपाळी (26) हांकां शेनवारा मरण आयिल्लें. ह्या प्रकरणांत कंपनीचो धनी शेखर राय जादा हाच्या आड मांद्रें पुलिसांनी गुन्यांव नोंद केला. ताचे कडेन कसलेच तरेचे पॅराग्लायडींग परवाने नाशिल्ल्याची म्हायती पुलिसांनी दिली.
17 जानेवारीक पुणेची शिवानी दाभळे ही पॅराग्लायडींग करचे खातीर केरी दोंगराचेर गेली. तिणें शेखर राय जादा हाका 4500 रुपया दिवन पॅराग्लायडींग करपा खातीर परवानगी घेतली. पायलट सुमन नेपाळी हाणें शिवानी दाभळे हिका घेवन पॅराग्लायडींग करपाक सुरवात केली. वाऱ्याची दिशा बदल्ली आनी त्याच वेळार पॅराग्लायडींगची एक दोरी तुटली. हाका लागून पॅराग्लायडींगचें नियंत्रण गेलें आनी पायलटा सयत शिवानीक फातराचेर पडून मरण आयलें. देंगणांतल्यान दोनूय कुडी काडून ताब्यांत घेतना पुलीस आनी उजो पालोवपी दळाच्या जवानंक सुमार देड वर लागलें.
ह्या प्रकाराक लागून आयतारा सगळे तरेचे बेकायदो पॅराग्लायडींग पॅराशूट वेवसाय बंद आशिल्ले. फाटल्या कितल्याश्याच वर्सां सावन केरी हरमल दोंगरा वयल्यान हरमल आनी केरी ह्या दोनूय दर्यादेगांचेर बेकायदो पॅराग्लायडींत चलता. हे संबंदांत खूब जाणांनी दर्यादेग पुलिसां कडेन कागाळी केल्यात, पूण तात्पुरती कारवाय करून उपरांत तांचे कडेन लक्ष दिनात, अशें लोकांचें म्हणणें आसा. मजगतीं, शिवानी दाभळे आनी सुमन नेपाली हांच्यो कुडी गोमॅकॉच्या मड्यांकुडींत आसात. दोगांचीय घरचीं अजून गोंयांत पावूंक नात. ती आयले उपरांत कुडींची वळख पटोवन तांचे सुवादीन दितले अशी म्हायती मांद्रे पुलीस निरक्षक शेरीफ जॅकीस हांणी दिली.
बेकायदो पॅराग्लायडींगाचेर कारवाय करचीः धरती
हे दुर्घटणे संबंदांत केरीची सरपंच धरती नागोजी हांचे कडेन संपर्क केलो. तेन्ना तांणी सांगलें, दर्यादेग वाठारांत कसलेच तरेचें पॅराग्लायडींग करपाक परवानगी दिवची न्हय, ते खातीर ताका विरोध करपी थाराव पंचायतीन मंजूर करचो, अशी सुचोवणी आमदार जीत आरोलकार हांणी केल्ली. ते प्रमाण तसो थाराव मंजूर करून कार्यवाये खातीर संबंदीत खात्याक धाडिल्लो. पूण ताची आयज मेरेन कार्यवाय जावंक ना. केरी गांवांत घडिल्ली ही दुर्घटणा सामकीच दुर्दैवी घडणूक आसा. अशे तरेची ही पयलीच घडणूक. जे कोण बेकायदो पॅराग्लायडींग करून लोकांचो जीव धोक्यांत घालतात आनी तांच्या मरणांक कारण थारतात ताचेर सरकारान खर कारवाय करची, अशी मागणी धरती नागोजी हांणी केल्या.
केरी दर्यादेगे वयले पॅराग्लायडींग बेकायदा
पणजी : केरी दर्यादेगेर पॅराग्लायडींगाक पर्यटन खात्यान मान्यताय दिवंक ना. दुर्घटणा जाल्ल्या पॅराग्लायडींगाक पर्यटन खात्यान परवानो दिवंक नासलो, अशें पर्यटन खात्यान स्पश्ट केलां. पर्यटन खात्यान हे विशींचे पत्रक जारी केलां. दुर्घटणा जाल्ले घडणुकेचे चवकशे उपरांत कारवाय जातली, अशें खात्यान स्पश्ट केलां.
शेनवारा केरी दर्यादेगेर पॅराग्लायडींग करपी पर्यटक चलये सयत ऑपरेटराक पडून मरण आयलें. पर्यटक शिवानी दाभाळे (26) आनी ऑपरेटर सुमन नेपाळी (25) हांकां मरण आयले. शेनवारा सांजेच्या 4.30 वराचेर ही घडणूक घडिल्ली. पॅराग्लायडींग, वॉटर स्पोर्टस हांकां पर्यटन खात्या कडल्यान परवानो घेवप गरजेचें आसा. पर्यटकांनी परवानो आशिल्ल्या पर्यटन सेवांचो लाव घेवचो. जांचे कडेन परवानो ना, त्या सेवांचो पर्यटकांनी लाव घेवचो न्हय, असो उलोन पर्यटन खात्यान पर्यटकांक मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
