भांगरभूंय | प्रतिनिधी
नवी दिल्ली, खबरां संस्था ः पॅन कार्ड आधारा कडेन लिंक करुंक नाशिल्ल्यान केंद्र सरकारान 11.5 कोटी पॅन कार्ड बंद केल्यात. आरटीआयक जाप दितना केंद्रीय प्रत्यक्ष कर मंडळान पॅन कार्डाक आधार कार्डा कडेन जोडपाची तारीख 30 जून आशिल्ल्याची म्हायती दिल्या. थारायिल्ल्या काळा भितर दोनूय कार्डां जोडूंक नाशिल्ल्यांचेर कारवाय केल्या.
आयकर कायद्याच्या कलम 139 ए ए प्रमाण 1 जुलय 2017 सावन पॅन वाटप केल्ल्या दरेकल्यान आनी आधार क्रमांक मेळोवपाक पात्र आशिल्ल्या दरेकल्यान आधार क्रमांक विधीन थारायिल्ल्या फॉर्मांत कळोवचो अशी तरतूद आसा. अशा व्यक्तींनी थारायिल्ले मुजती पयलीं आपलो आधार आनी पॅन सक्तीन लिंक करप गरजेचें आसा.
पॅन -आधार लिंक आसा कांय ना कशें तपासप?
आयकर ई-फायलिंग पोर्टल / www.incometax.gov.in/iec/foportal/ उगडात.
होम पानाचेर ‘Link Aadhaar Status’ तपासात.
मागीर तुमचो पॅन नंबर आनी आधार नंबर घालात.
मागीर ‘View Link Aadhaar Status’ हाचेर क्लिक करात.
बिझनेस स्टँडर्डाच्या अहवाला प्रमाण यूआयडीएआयन आधार दस्तावेज फुकट अपडेट करपाची तारीख 14 सप्टेंबर 2023 ते 14 डिसेंबर 2023 मेरेन 3 म्हयने वाडयल्या. हाचे भायर 10 वर्सांच्या कार्डधारकांक नवे म्हायती सयत आपलो तपशील अपडेट करपाक युआयडीएआयन सांगलां. नांव, पत्तो आनी लग्न वा मरण आयल्यार नात्यांतल्या लोकांचो तपशील आदी तपशील अपडेट करचो पडटलो. तपशील युआयडीएआयच्या संकेतथळार वा थेट ₹ 25 फारीक करून अपडेट करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
