पॅन अर्ज वा आयकर रिटर्न भरपा खातीर आधार एनरोलमेंट नंबर अवैध

भांगरभूंय | प्रतिनिधी

2017 वर्सा सावन उपलब्ध आशिल्ली ही सुविधा 1 ऑक्टोबर सावन बंद

नवी दिल्ली, खबरां संस्था ः ऑक्टोबर सावन आतां पॅन अर्ज वा आयकर रिटर्न भरपा खातीर आधार अर्ज क्रमांक (एनरोलमेंट नंबर) वैध आसचो ना. आतां हे खातीर फकत आधार क्रमांक दिवचो पडटलो. आधार अर्जाच्या नांवनोंदणी आयडीचेर आदारून जायती पॅन कार्ड तयार करूं येतात, जाका लागून पॅन कार्डाचो गैरवापर जावंक शकता अशें सरकारान सांगलां. केंद्र सरकारान 1 ऑक्टोबर 2024 सावन हो पर्याय बंद करपाचो निर्णय घेतला. ही सुविधा 2017 वर्सा सावन उपलब्ध आसा.

आधार नोंदणी आयडी आधार क्रमांका परस वेगळो

आधार क्रमांक हो 12 अंकांचो वैयक्तीक वळख क्रमांक, जो भारतांतलो दरेक मनीस वळख आनी पत्त्याचो पुरावो म्हूण ताचो वापर करता. जाल्यार आधार नोंदणी आयडी (ईआयडी) हो 14 अंकांचो क्रमांक आसता, जो आधार कार्डा खातीर अर्ज करपी अर्जदाराक दितात.

आधार-पॅन लिंक करपाची प्रक्रिया-

० पयलीं आयकर संकेतथळार वचात.
० थंय क्विक लिंकांतल्या आधार लिंकाचेर क्लिक करात.
० पॅन आनी आधार क्रमांक घालून व्हॅलिडेट हाचेर क्लिक करात.
० पेमेंट खातीर एनएसडीएल संकेतथळाक भेट दिवपाची लिंक दिसतली.
० तुमकां CHALLAN NO./ITNS 280 हातूंत Proceed हाचेर क्लिक करचें पडटलें.
० लागू कर (0021) आयकर निवडात.
० पेमेंट प्रकारांत, तुमकां हेर पावती निवडची पडटली.
० नेट बँकिंग आनी डेबिट कार्ड अशे पेमेंटाचे दोन पर्याय उपलब्ध आसतले.
० तुमच्या सोयी प्रमाण दोन पर्यायांतले खंयचेय पर्याय वेंचूंक शकतात.
० कायम खातें क्रमांकांत तुमचो पॅन कार्ड क्रमांक घालचो.
० मूल्यांकन वर्स 2023- 2024 निवडप.
० पत्त्याचेर जाग्यार तुमचो पत्तो घालात.
० आतां कॅप्चा कोड घालात आनी proceed हाचेर क्लिक करात.
० Proceed हाचेर क्लिक केल्या उपरांत, तुमकां तुमची भरिल्ली म्हायती स्क्रीनीचेर दिसतली.
० म्हायती तपासल्या उपरांत, Agree चेर टिक करात आनी Submit to Bank हाचेर क्लिक करात.
० तुमी घाल्ल्या तपशीलांत कसलीय चूक आसल्यार तुमकां संपादनाचेर क्लिक करचें पडटलें.
० आतां नेट बँकिंग वा डेबिट कार्ड पर्याय निवडून 1000 रुपया फारीक करचे पडटले.
० वेव्हार पुराय जाले उपरांत तुमकां पीडीएफ येतली. ती डाउनलोड करात.
० हो पेमेंट अपडेट जावपाक 4- 5 दीस लागतले.