भांगरभूंय | प्रतिनिधी
नवी दिल्ली, खबरां संस्था: केंद्र सरकारान ट्रान्सजेंडर पर्सन कायदो २०१९ खाला पॅन कार्ड अर्जा खातीर जारी केल्ल्या वळखपत्राक वैधताय दिल्या. सरकारान सर्वोच्च न्यायालयाक ही म्हायती दिल्या. आतां ट्रान्सजेंडर तांच्या लिंग वळखपत्रा वरवीं पॅन खातीर अर्ज करपाक शकतात. हाका लागून तांकां पॅन आनी आधार लिंक करप सोपें जातलें.
ट्रान्सजेंडर रेश्मा प्रसाद हांणी २०१८ त सर्वोच्च न्यायालयांत याचिका दाखल केल्ली. हातूंत ट्रान्सजेंडर्स पॅन आनी आधार लिंक करपाक शकतात. ताका लागून आधार कार्डार, पॅन कार्डार ट्रान्सजेंडरच्या वेगळे श्रेणीचो पर्याय उपलब्ध करून दिवपाचे निर्देश केंद्राक दिवपाची मागणी केली.
हाचेर सर्वोच्च न्यायालयान केंद्राक ट्रान्सजेंडर व्यक्ती (हक्कांचें संरक्षण) कायदो २०१९ खाला जारी केल्ले वळखपत्र आनी लिंग बदल प्रमाणपत्राचो पॅन कार्ड अर्जा खातीर वैध कागदपत्रां म्हणून विचार करपाची सुचवणी केल्ली. केंद्रान तांची सुचवणी मान्य केल्ल्याचें सर्वोच्च न्यायालयान म्हणलें.
सर्वोच्च न्यायालयाचे न्यायमूर्ती सुधांशू धुलिया आनी न्यायमूर्ती अहसानुद्दीन अमानुल्ला हांच्या खंडपीठान सांगलें, याचिका प्रलंबीत असताना आमी सरकारा कडल्यान जाप मागिल्ली. आतां सरकारान याचिकेंत मांडिल्ल्यो सगळ्यो मागण्यो मान्य केल्ल्याचें म्हणलां.
आतां ट्रान्सजेंडर पर्सन (हक्कांचें संरक्षण) कायदो २०१९ च्या कलम ६ आनी ७ खाला जारी केल्ल्या प्रमाणपत्राक मान्यताय दितले, हें जिल्हाधिकार्यांनी जारी केलां.
बिहारांतली समाजीक कार्यकर्ती ट्रान्सजेंडर रेश्मा प्रसाद हांणी केंद्र सरकारकडेन पॅन कार्डार वेगळ्या तृतीय लिंग श्रेणीचो पर्याय उपलब्ध करून दिवपाची मागणी केल्ली. जाका लागून ट्रान्सजेंडर्स आधार कार्डा कडेन लिंक करून अचूक वळख प्रमाणपत्र तयार करपाक शकतले. तांणी कोर्टाक सांगलें, ती पॅनाक आधारा कडेन लिंक करपाक शकना. कारण ताच्यांत तृतीय लिंगाचो पर्याय नाशिल्लो.
ट्रान्सजेंडर पर्सन (हक्क संरक्षण) कायदो २०१९ म्हळ्यार कितें?
ट्रान्सजेंडर पर्सन (हक्कांचें संरक्षण) कायदो २०१९ त संसदेंत मंजूर जालो. कायद्याच्या कलम ६ प्रमाण जिल्लो दंडाधिकारी ट्रान्सजेंडर व्यक्तीक प्रमाणपत्र दिवपाक शकतात. कलम ७ म्हणटा, जिल्लो दंडाधिकारी लिंग बदल सांगपी प्रमाणपत्र जारी करपाक शकता. पॅन कार्ड खातीर अर्जाची प्रक्रिया फकत आयकर नेम १९६२ वरवीं थारायता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
