भांगरभूंय | प्रतिनिधी
खबरां संस्था
नवी दिल्ली : शुक्रारा भारतान अमेरिकेच्या फुडारपणा खाला ‘पॅक्स सिलिका’ उपक्रमांत उपचारीक तरेन प्रवेश करून इतिहासीक पावल घातलां. इंडिया एआय इम्पॅक्ट परिशदेचे फाटभुंयेर दोनूय देसांनी ‘पॅक्स सिलिका घोशणापत्राचेर’ सयो केल्यो.
हें घोशणापत्र कृत्रीम बुद्धिमत्ता (एआय), सेमीकंडक्टर आनी म्हत्वाच्या पुरवण सांखळे वयल्या द्विपक्षीय आदाराक ठोस आकार दिवपी थारलां. घोशणापत्रांत अर्थीक सुरक्षा आनी राष्ट्रीय हितां खातीर लवचीक, विस्वासार्ह पुरवणेचें म्हत्व अधोरेखीत केलां. तशेंच कृत्रीम बुद्धिमत्तेक दीर्घकालीन संवसारीक समृद्धीची परिवर्तनकारी शक्त म्हूण मान्यताय दिल्या.
पॅक्स सिलिका हो अमेरिकेच्या स्टेट डिपार्टमेंटाचो मुखेल धोरणात्मक फ्रेमवर्क आसा. हाचो मुख्य उद्देश तंत्रज्ञान, सेमीकंडक्टर, क्रिटिकल मिनरल्स आनी उद्देगीक परिसंस्थेतल्या विस्वासू भागिदारांचें संवसारीक नॅटवर्क निर्माण करपाचो आसा. हो उपक्रम चीनाच्या शेकाक संतुळीत करचे खातीर इश्ट देशां मदीं सुरक्षीत तंत्रज्ञान पुरवण सांखळी उबी करचे खातीर डिझायन केलां.
परिशदेंत अमेरिकेचे राजदूत सर्जिओ गोर हांणी भारताच्या प्रवेशाक संवसारीक तंत्रज्ञान वेवस्थेंतलो म्हत्वाचो पांवडो म्हणलां. तांणी सांगलें, आयज तुमच्या सगल्यां मुखार नवी दिल्लींत उबो रावून हो इतिहासीक खीण मनयतना आपल्याक खूब अभिमान दिसता, कारण आमी भारताक पॅक्स सिलिका परिवारांत येवकार दितात. फकत एका म्हयन्या आदीं आपूण ह्या असामान्य देशांत अमेरिकेचो राजदूत म्हूण आयला. आपल्या पयल्या कांय सप्तकांत आपूण सावथ ब्लॉकाच्या कॉरिडोरांत भोंवलों, बंगळुरूंत नवनिर्माण करप्यांक मेळ्ळो आनी फुडार घडोवपी उद्देजकां वांगडा जेवलों. आपल्याक सगल्यांत चड प्रभावीत करपी गजाल खऱ्यांनीच अजापीत करपी आसा, ती म्हणल्यार भारतीची दृढ इत्साशक्त आनी स्वताचो मार्ग थारावपाची निर्धारिता. हो करार फकत तंत्रज्ञाना पुरतो मर्यादीत ना, जाल्यार वेपार, संरक्षण आनी धोरणात्मक मळा वयल्या व्यापक संरेखनाचें प्रतीक आसा. भारताच्या प्रवेशाक लागून पॅक्स सिलीका आनीक घटमूट आनी समावेशक जातलें. हो उपक्रम सेमीकंडक्टर उत्पादनांत भारताचे वाडटे भुमिकेक मान्यताय दिता. हाका लागून दोनूय देशांक चीनाचे निर्भरते पसून मुक्त जावपाक मजत जातली. भारताची डिझायन तांक, कुशळ मनीसबळ आनी अमेरिकेच्या प्रगत तंत्रज्ञानाचो संगम फुडारांतल्या एआय- संचलीत अर्थवेवस्थे खातीर म्हत्वाची थारतलो, अशें राजदूत गोर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
