भांगरभूंय | प्रतिनिधी
कांय लोकांक प्रसिद्धीची हाव आसता. कायम उजवाडांत रावपाचें हें वेसनूच. सिनेमा आनी राजकारणांतल्या लोकांक हाची बादा जाल्ली आसता. खास करून सिनेमा नट- नटयांक. निजाच्या अभिनेत्यांक हाची गरज पडना. दुय्यम नटांक कायम प्रसिद्धींत रावना जाल्यार कामां मेळनात. मागीर तांकां कितें ना कितें करचें पडटा…. आनी आमी भारतीय भावनीक, संवेदनशील लोक आशिल्ल्यान आमकां हे स्टंट मना पसून आवडटात. खूब खेपे हाचो त्या कलाकाराक फायदोच जाता. सिनेमा सृश्टींतल्यान भायर पडिल्ल्या कांय नायिकांनी अंगप्रदर्शन करून परत नांव आनी सिनेमा मेळयिल्ल्याचीं जायतीं उदाहरणां आसात. सोशल मिडियाचेर तर स्टंट करपी नटयो आसात. आनी तांचे लाखांनी फाॅलोवर. धन्य त्यो नटयो, धन्य तांचे ते स्टंट आनी धन्य ते फाॅलोव्हर!! करियराक परतून गती दिवपाक, चार पयशे जोडपाक, आपूण कोण तरी वेगळो हें दाखोवपाक जायते जाण जगा वेगळें कितें तरी करतात. हालींच पूनम पांडे हे नटयेन सिनेमोगी, सोशल मिडिया भक्तांच्या भावनां कडेन खेळपाचो यत्न केलो. आपूण मेली अशें तिणें जाहीर केलें आनी दुसरे दीस समेस्तांची माफी मागून सर्वियकल कॅन्सराचे (गर्भाशयाच्या तोंडाचो कॅन्सर) जागृताये खातीर आपूण हो स्टंट केल्लो अशें स्पश्ट केलें. म्हज्या मरणाचे बातमेक लागून सगल्यांक ह्या दुयेंसा विशीं कळ्ळां, असो दावोय तिणें केला. विशेश म्हणल्यार सगल्या प्रसार माध्यमांनी, सोशल मिडियान पूनम पांडेच्या मरणाची खबर दिली. थोड्यांनी खबर खरी काय फट तें कळना, असो सादूर पवित्रोय घेतलो. दुसरे दीस ती जिती आसा, असो व्हिडियो इन्स्टाग्रामाचेर खुद्द पूनमान घालो. पूण कांय दिसाळ्यांनी ताची व्हडलीशी दखल घेवंक ना. थोड्या चॅनलांनी मात ताचेरुय सविस्तर बातमी दिली. थोड्यांनी फटीच्या मरणा दीस पूनमाचेर, कॅन्सराचेर प्रायम टायम चर्चाय केल्या आसतली.
सोशल मिडियाचेर फेक न्यूज दिवंक मेळना. मात, धर्मीक भावना दुखावपी पोस्ट सोडल्यार कोण फेक न्यूजांची दखल घेना. टिका करपी, गाळी संवपी, दिशाभूल करपी कमेंटांचेंय पुलिसांक वा तपास यंत्रणांक पडून गेल्लें नासता. सायबाचो वयल्यान आदेश आयलो जाल्यार मात अर्दवरा भितर संबंदीत पोस्ट घालप्या आड गुन्यांव नोंद जाता. आयटी कायदो- 2000 च्या कलम 67 खाला, सोशल मिडियाचेर पयले फावट कोणेय वावडी सोडली आनी तो दोशी सिद्ध जालो जाल्यार ताका तीन वर्सांची बंदखण, पांच लाख रुपयांचो दंड जावं येता. ताणे परत अशें केल्यार पांच वर्सांची बंदखण आनी 10 लाखां मेरेन. सगल्यांकूच ख्यास्त जाताच अशें ना. पूण, सोशल मिडियाचेर जें कितें चल्लां तें पळयल्यार दरेका राज्यांत दिसाक पांच जाणांक तरी फेक न्यूज, दुस्वास पातळावपी पोस्ट, कंमेट घाल्ले खातीर ताब्यांत घेवंक मेळटलें.
पूनम पांडे आनी तिचो घोव सॅम अहमद बाॅम्बे हांचेर मे 2022 त चापोली धरणाचेर अश्लील व्हिडियो केल्ले खातीर गोंय पुलिसांनी गुन्यांव दाखल केल्लो. सरकारी यंत्रणा, मालमत्ता वापरिल्ले खातीर तिका ताब्यांतूय घेतिल्ली. दोग पुलिसांक निलंबीतूय केल्ले. पूनम आनी हेर कांय नटयांच्या स्टंटांक वा प्रत्येक गजालींक म्हत्व दिवपी पत्रकार देशांत आसात. मरणाच्या स्टंटाचें एक समजू येता. पूण, सिनेमा कलाकार करता ते प्रत्येक गजालीक प्रसिद्धी दितकच पत्रकारितेचो दर्जो देंवता हाची जाणीव दवरपाक नाका? हें रुचीन पळोवपी, वाचपी रसिक आसात, ही गजाल खरी. पूण सोशल मिडियाचे ह्या नट- नटयांनी स्वताचें विश्व निर्माण केल्लां, म्हणटकच मुखेल पत्रकारिता प्रवाहांत हें उणें जावंक नाका? कलाकार बाजारांत वा खंयच्या दुकानार वतात, व्यायाम शाळेंत वतात, विमानतळाचेर वतात, तेन्ना गुप्तहेर कशे तांचे फाटल्यान भोंवपी फोटोग्राफर (काय फोटोपत्रकार?) आसात. ती नटी पळयना जाल्यार लाचार जाल्ले भशेन मॅडम प्लिज, एक फोटो…. अशें करीत तांचे फाटल्यान वतात. सोशल मिडियाचेर हे व्हिडियो पळोवंक मेळटात. कलाकार सोडात, पूण तांच्या 5- 6 वर्सांच्या भुरग्यांचो पसून ते फाटलाव करतात. कांय अभिनेत्यांच्या घरा भायर खंय डझनभर फोटोग्राफर सकाळ, सांज बशिल्लेच आसतात. हे पत्रकार काय आनीक कोण तें कळपाक मार्ग ना. कांय नट, नटयो तांकां मुद्दाम आपोवनूय हाडटात आसतल्यो.
पूनम पांडेन केलो तो मरणाचो स्टंट सरकारी यंत्रणा तसोच सोडून दितली काय कायद्या प्रमाण कारवाय करतली तें रोखडेंच कळटलें. कॅन्सरा विशीं जागृताय जाल्या आसतली. पूण फिल्मी, सोशल मिडिया आनी पत्रकारितेच्या मळाक खत लागलें ताचें कितें??
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
