भांगरभूंय | प्रतिनिधी
ग्वाल्हेर, खबरां संस्था ः भुरग्याच्या आत्महत्येची खबर कळटकच आनी ताची कूड पळयले बरोबर ताच्या आवय- बापायनय गोळ घेवन आत्महत्या केली. दोन ते तीन दीस शेजाऱ्यांक हे घडणुके विशीं कांयच खबर नाशिल्लें. जेन्ना पुलीस घडणूक सुवातेर पावले तेन्ना तीन कुडी गोळ घेतिल्ल्या स्थितीत सांपडल्यो. ही धक्को दिवपी घडणूक ग्वाल्हेरांतल्या हुरावली वाठारांत घडल्या.
एका इंग्लीश दिसाळ्याच्या म्हणण्या प्रमाण, आत्महत्या केल्ल्या भुरग्याची आवय शाळेची मुख्यध्यापिका आशिल्ली जाल्यार ताचो बापूय प्रॉपर्टी डीलर आशिल्लो. जाल्यार तांचो पूत अचल बारावीत शिकतालो. दोगांयनी आपलो पूत मेल्लो पळयलो आनी गोळ घेवन आपलेंय जिवीत सोंपयलें. जेन्ना पुलीस त्या जाग्यार पावले तेन्ना तांकां घरांत तीन गोळ घेतिल्ल्यो कुडी दिसल्यो तशेंच जमनीर व्हड प्रमाणांत रगतय दिसलें. ग्वाल्हेरचे प्रॉपर्टी डीलर जितेंद्र झा (51), ताची घरकान्न त्रिवेणी झा (46) आनी तांचो पूत अचल (17) अशी मेल्ल्याची नावां जावन आसा.
हे घडणुकेची म्हायती कशी मेळ्ळी?
जितेंद्र हांचो मांव तांच्या घरा आयलो. कारण जितेंद्र झा तांचो फोन उखलनाशिल्लो. तशेंच ताची धूवय फोन उखलनाशिल्ली. नेमकें कितें घडलां तें पळोवपाक घरा येतकच ही घडणूक घडिल्ल्याचे उजवाडाक आयलें. अचलाची आत्महत्याची नोट पुलिसांक मेळ्ळ्या. ते उपरांत तिगांय कुडींची फॉरेन्सिक चाचणी केल्ल्या दोतोरान ह्या तिगांयनी आत्महत्या केल्या अशें सांगलें. तशेंच जितेंद्र झान आनी ताचे बायलेन म्हळ्यार त्रिवेणीन हाताची शिर कापिल्ली. उपरांत ताणी गोळ घेवन आत्महत्या केली. भुरग्याची आत्महत्या पळोवन घोव- बायलेंत झगडीं जालीं अशेंय समजता. ह्या प्रकरणांत पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
