पूण सळसळटें रगत ओगी कित्याक?

भांगरभूंय | प्रतिनिधी

सध्या गोंयांत चलिल्लें ‘कॅश फॉर जॉब’ प्रकरण हें बशींतल्या राखीव सिटां सारकेंच. ज्यो नोकऱ्यो पात्र उमेदवारां (मॅरीट) खातीर आसतात, त्यो लांच दिवन हे संवेदना शेणून बशिल्ले आनी आपसुवार्थी उमेदवार बळकायतात.

ह्या लेखा बरोबर घेतला तो फोटो फाटल्या सप्तकांतलो. फोंडें-पणजे मार्गार धांवपी कदंब बशींतलो. फक्त ‘महिलां’ खातीर राखीव आशिल्ल्या सिटाचेर दादलो बसला. तिचे फाटल्यानय राखीव आशिल्ल्या सिटांचेर दादलेच बशिल्ले. हाचो अर्थ तिच्या हक्काचेर पांय दवरूनय ती ओग्गी आसा आनी ती आपलो हक्क मागना म्हूण ते दादले कायदो मोडूनय आपलो प्रवास सोंपो आनी आरामदायी करतात.
जे मेरेन आपलो हक्क मागिनात, तो मेरेन तो मेळना हें आतां मेरेनच्या कितल्याशाच घडणुकांनी दिसून आयलां. पूण ते खातीर आवाज काडचो पडटा, ताका गती दिवची पडटा आनी अन्याय करतल्यां आड झगडचें पडटा. तितलें धाडस जाय. नाजाल्यार, न्याय म्हणटात तो केन्नाच मेळचो ना.
बऱ्याच वर्सां आदीं कुठ्ठाळच्या पुलाचें काम चलतालें तेन्ना जड वाहनां पुला वयल्यान धाडिनाशिल्ले. पणजेच्यान मडगांव-वास्को वचपी बशी आलतडीन रावताल्यो. तातूंतले प्रवाशी देंवून मागीर कदंबच्या मिनी बशींनी बसून पलतडी वताले. ते उपरांत ते वटेच्यान आशिल्ल्यो बशी ह्या प्रवाशांक मुखारल्या मार्गार व्हरताले. खूब दीस हो प्रकार चलिल्लो याद जाता. एका सांजवेळार हांवूय पणजेच्यान कुठ्ठाळे आलतडीन देंवलों आनी थंय आशिल्ले कदंबाचे मिनी बशींत चडलों. म्हजे बरोबर आनिकूय कांय लोक चडले. बशींतलीं सीटां आदींच काबीज केल्लीं. कंडक्टर बशीचे भायर आशिल्लो. हांव चडून फाटल्यान वतना एका सूट-बुटांतल्या बिगर गोंयकारान म्हाका ‘ते बसींत तांचे शिवाय आनीक कोण चडपाक शकना. ती बस तांणीच भाड्याक घेतल्या’ अशें सांगलें. हांवें कंडक्टराक विचारतकच तो मान सकयल घालून ओग्गी रावलो. आमकां त्या बिगर गोंयकारांनी दादागिरी करून सकयल देंवयले. हे बिगर गोंयकार बरेच पेझाद आशिल्ले आनी तांणी ह्या कंडक्टराक लांच दिवन विकत घेतिल्लो हें तांच्या वागण्या वयल्यान कळ्ळें. म्हजेर आनी हेर गोंयकारांचेर जाल्लो हो अन्याय अजून म्हाका याद येता आनी लांच घेतिल्ल्यां आड नकळत तोंडांतल्यान स्राप सुट्टात. आमच्या ताळ्यांतली उणी काडून स्वता खावपाची दादागिरी ह्या पेझाद बिगर गोंयकारांनी केल्ली.
ह्या फोटवांत दिसता, ती लेगीत एक दादागिरीच. गोंयकारान गोंयकार बायलेचेर केल्ली. ही बस शटल आशिल्ल्यान ताचेर कंडक्टर बी कोण आसना आनी ड्रायव्हर फाटल्यान वळून केन्ना पळयना. अशे परिस्थितींत एक तर ते बायलेन आपलो हक्क मागपाक जाय आशिल्लो, नाजाल्यार त्या दादल्यांनी समजून घेवन तिका तिचो हक्क दिवपाक जाय आशिल्लो. जें तांणी केलें ना.
सकाळची शटल सेवेचे बशींतल्यान वचपी प्रवासी चडशे सरकारी कर्मचारी आसतात. हे दादलेय ह्या वर्गांत पडटात जाल्यार आमची ‘सिस्टम’ कितली भ्रश्ट जाल्या आनी संवेदना, मान, आदर कशे तरेन मेला हें समजूं येता. घडये हेच खातीर, दुसऱ्यांच्या हक्कांचें अपहरण करून ते आपल्याक मेळोवप हें सदचेंच जालां.
कांय तेपा आदीं बशींत जाण्टीं, बायलां, खास करून गुरुवार बायलां बी दिसल्यार कोणूय तांकां बसपाक दितालो. आतां हें चित्र दिसना. लोकांच्यो संवेदना मेल्यात. तातूंत दरेकल्याक बशींत बसकतकच आपलो मोबायल काडून चाळपाची संवय जाल्या. अशें अॅडिक्शन जाल्ले आमचे तरणाटे ज्येश्एांक आनी श्रेश्ठांक बसपाक दितले? हाची जाणीव सरकाराक येवंक जाय आनी दरेक बशींतले कायदे खरेपणान चालीक लागूंक जाय. ज्येठांक, बायलांक आनी खासा क्षमतेच्या व्यक्तींक तांची बसपाची हक्काची सुवात मेळपाक जाय. वाटेर बस आडावन ‘टीसी’ हें करपाक शकतात. सीसीटीव्ही बसोवन मॉनिटर करूं येता, पूण त्या सीसीटीव्हींचें मोल सरकारी कागदांचेर बशी परस चड जाल्यार लुकसाणांत आशिल्लो वेवसाय फोंडांत पडपाक शकता.
आमचेर अन्याय जातकच आमी पयलीं पुलिशेंत धांवतात. पूण हालीं तेंपार तांचेर कितलो विस्वास दवरप हो लेगीत प्रस्न जाला!!! उत्तर गोंयांत एक अशी घडणूक घडली, जी आयकतकच पुलिसां वयलो विस्वासूच गेला. एका घर धनयाक गुंड प्रवृत्तीचो व्यक्ती तें घर आपल्याक दी म्हूण त्रास करतालो. पिडीत जेन्ना पुलिशें कडेन न्याय मागपाक गेलो, तेन्ना थंयचो अधिकारी ताका सांगता ‘‘तुका त्रास करता मरे तो, मागीर दिवन उडय मरे घर ताका’. लोकांच्यो संवेदना मेल्यात म्हणटात तें हेच खातीर. कांय भ्रश्ट ‘सरकारी नोकरांचें’ लांच घेतले बगर घर चलना. तेन्ना ते लोकांक न्याय दिवपाचे सोडून, अन्याय करतल्यांक पोसवण दितात. ही भ्रश्ट पोसवण सगल्या थरांतल्यान थांबोवपाची गरज आसा. पूण ते खातीर धाडस जाय आनी झुजपाची उर्बा जाय.
सध्या गोंयांत चलिल्लें ‘कॅश फॉर जॉब’ प्रकरण हें बशींतल्या राखीव सिटां सारकेंच. ज्यो नोकऱ्यो पात्र उमेदवारां (मॅरीट) खातीर आसतात, त्यो लांच दिवन हे संवेदना शेणून बशिल्ले आनी आपसुवार्थी उमेदवार बळकायतात. आतां तांचे पयशे कोणें कोणें खाल्यात म्हूण तांची काळकूट करपाची गरजूच ना. तांच्या कर्मांनी तांकां ते परिस्थितीर व्हेल्यात. तांकां ताचो पश्चतापच न्हय तर सरकारी नोकरी करपाची आपली लायकी ना हें तांकां होलमलपाक जाय. अशे जे उमेदवार आयज सरकारी खात्यांनी आपलीं सिटां घेवन बसल्यात, तांचे कडल्यान ह्या राज्याचें कल्याण जातलें अशें गृहीत धरूंक शकनात. ते जे वाटेन चलत ह्या सिटांचेर बसल्यात तेच वाटेर चलतले आनी नोकरे खातीर दिल्ले पयशे लांच घेवन भरून काडटले. तांच्या मॅरिटाची चांचणी जावंक ना म्हणटकच सरकारी कागदपत्रांची, प्रकियेची, कामां चालीक लावपाची भास तांकां कळटा काय देव जाणा. ती कळना म्हणूनच ते एजंटांचे पांय धरून नोकरेक लागल्यात अशेंय म्हणल्यार अतिताय जावची ना.
लायकी नाशिल्ले लोक अशा पदांचेर पावतात ताचें दुख्ख जाताच, पूण ताचे परस दोब्राद दुख्ख जाता जेन्ना अन्याय जाल्ली व्यक्ती न्याया खातीर भायर सरना. पन्नास सरकारी पदां खातीर हजारांनी अर्ज येतात. पयशे दितात तो नोकरेक लागतात आनी नपास जाल्ले परत सरकारी नोकरेची वाट पळयतात. सध्या ‘कॅश फॉर जॉब’ प्रकरण गाजता, पूण परत परत अन्याय सोंसपी आमचो पात्र तरणाटो. (उमेदवार) भ्रश्ट सिस्टमी आड आवाज काडटना दिसना!!! रस्त्यार देंवपाचें सोडूनच दियात, तो सादो सोशल मिडियाचेर लेगीत ही चळवळ चलोवपाक तयार ना. बशींतली बायल न्याय मागपाक दडजेता हें समजूं येता, पूण सळसळटें रगत ओगी कित्याक?

संजय बोरकार
9921343430