भांगरभूंय | प्रतिनिधी
मुंबय, खबरां संस्था : आयएएस अधिकारी पूजा खेडकर हांचेर सुरू जाल्लो वाद चर्चेत आसतना आतां आनीक एक प्रकरण मुखार आयलां. युपीएससीची परिक्षा दिवन उपरांत कोटाचो गैरवापर करून अधिकारी जावपा खातीर दिव्यांग प्रमाणपत्र दिल्ल्याचो आरोप प्रफुल देसाय हांचेर जाता. मात तांणी तो न्हयकारला.
नेमकें प्रकरण कितें?
2019 वर्साचे युपीएससी परिक्षेंत 532 नंबर मेळोवपी प्रफुल देसाय हांणी घोड्याचेर बसून भोंवपाचीं तांची चित्रां सोशल मिडियाचेर घालीं आनी हेच कारण तांचेर आरोप करपाचें कारण थारले. उपरांत तांच्या दिव्यांग प्रमाणपत्राचेर वाद निर्माण जालो. देसाय सध्या करीमनगरांत (तेलंगण) अतिरिक्त जिल्लोधिकारी म्हणून काम करतात. युपीएससी परिक्षेंत ओएच आर्थोपेडिकली हँडीकॅप्ड कोटाचो गैरवापर केल्ल्याचो आरोप तांचेर आसा.
आरोप न्हयकारले
देसाय हांकां हे विशीं विचारलें तेन्ना तांणी सगळे आरोप न्हयकारले. तांणी म्हणलें, “म्हजो एक पांय दुबळो आसा, पूण ताचो अर्थ हांव शारिरीक गजालींनी वांटो घेवंक शकना असो न्हय.” म्हज्या प्रशिक्षणाच्या काळांत लेगीत कांय व्यायाम आशिल्ले, तातूंत हांवें वांटो घेतिल्लो. ‘इंडिया टुडे’च्या खबरां प्रमाण तांच्या दाव्या पांयांत 45 टक्के दुबळेंपण आसा. देसाय हांणी सांगलें म्हज्या एका पांयाक पोलियो जाला. देखून म्हाका धांवपाक मेळना, पूण चलपाक मेळटा, सायकल चलोवंक लेगीत मेळटा. हांवें सामान्य जिवीत जगपाक जायना, असो प्रस्नूय ताणें विचारलो आनी सगळे आरोप न्हयकारले.
फोटो आनी व्हिडियो व्हायरल
प्रफुल्ल देसाय हांचे फोटो आनी व्हिडियो व्हायरल जाल्यात. ह्या व्हिडियोंत देसाय आपल्या इश्टां वांगडा टेनिस कोर्टाचेर सेल्फी घेतना दिसतात. दुसऱ्या फोटोंत डेहराडून वाठारांत सायकल चलयतना दिसतात. सोशल मिडियाचेर घाल्ल्या फोटोंत देसाय ऋषिकेशांतल्या न्हंयेंत राफ्टिंग करतना आनी घोड्याचेर बसून भोंवतना दिसतात.
सोशल मिडिया वयल्यान टिका
देसाय हांचे फोटो व्हायरल जाले उपरांत आतां वेगवेगळ्या नेटिझन्सांच्यो प्रतिक्रिया मुखार येवपाक लागल्यात. ‘यूपीएससींत इतली तांक आनी जादूची शक्त आसा की दिव्यांग आशिल्ले अधिकारी आतां न्हंयेंचेर राफ्टिंग करपाक आनी घोड्याचेर बसून भोंवपाक शकतात.’, ‘एम्साचो (AIIMS) प्रचार करचे बदला आतां युपीएससीचो करपाक जाय कारण तेंच खरें हॉस्पिटल ’अशी टिका जाता.
देसाय हांचें स्पश्टीकरण
व्हायरल जाल्ल्या फोटोंचेर देसाय हांणी म्हणलें, हांव नेमान बॅडमिंटन खेळना. म्हाका कांय इश्ट आसात, जांचे वांगडा हांव केन्ना केन्ना खेळपाक वता. दिव्यांग म्हणल्यार म्हजो पांय पुराय काम करना आनी हांव मातुय चलूंक शकना असो अर्थ जायना. इश्टां वांगडा थोडो वेळ खेळपाचो सराव करतां. डिसेंबर 2020 वर्सा ट्रेक करपाक गेल्लो, थंय सायकल चलयल्ली. मसूरी सावन केम्पटी फॉल्स मेरेन सायकल चलोवन गेलो पूण पुराय प्रवास हांवेन सायकल चलोवन करुंक ना अशें स्पश्टीकरण देसाय हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
