भांगरभूंय | प्रतिनिधी
आ यज 23 एप्रील. संवसारीक पुस्तक दीस. आयच्या दिसा पॅरीसांत युनेस्को वतीन संवसारीक पुस्तक दीस मनोवपाचो निर्णय जालो. 23 एप्रील होच दीस संवसारीक पुस्तक आनी कॉपी रायट दीस मनोवपाचें एक उद्दिश्ट आशिल्लें. संवसारीक ब्रिटीश लेखक शेक्सपियर, तशेंच मिगुएल सर्व टीस तशेंच गोर्सिलोसो हांचो 23 एप्रील हो मरण आयिल्लो दीस. तांचे यादी खातीर हो दीस मनयतात.
ह्या वर्साचें पुस्तक दिसाचें घोशवाक्य आसा तुमचे पद्दतीन वाचात. खरें म्हणल्यार पुस्तक हें गिन्यानाचें भंडार आसा. तातूंतल्यान आमकां नवी उर्बा मेळटा. मनशाक सुसंस्कृत करपाक पुस्तकांची भुमिका खूब व्हड आसा. पुस्तकान मनशाची नदर बळावता. वाचनान ज्ञानांत भर पडटा. तशेंच विचारांची दालनां लेगीत उक्तीं जातात. आपणे कशें जगचें हें पुस्तकांतल्यान आमी शिकूंक शकता. हे नदरेन भौशीक वाचपघाराचें म्हत्व खूब व्हड आसा.
पुस्तक दिसाच्या कार्यावळींनी चडशे कडेन मुखेलपणान वाचपघरां आनी शाळां वरवीं आयोजीत करतात आनी तातूंत भौशीक वाचन, लेखकां सयत प्रस्न्जापो, लेखन सर्त आनी फुकट पुस्तकां आनी बुकमार्काचे वितरण हांचो आस्पाव आसता. वाचपघरांत वा पुस्तकांच्या दुकानांनी वचून, केन्नाच वाचूंक नाशिल्ल्या लेखकांचीं नवीं पुस्तकां घेवन वा पोरणे आवडटे पुस्तक परतून वाचून हो दीस मनोवं येता. जर तुमचीं भुरगीं आसत जाल्यार तांकां बराबर घेवन वचात आनी तांकां वाचपा खातीर स्वताची पुस्तकां वेंचूंक दियात वा तुमी तांकां वाचून दाखोवंक शकतात. तुमच्या समुदायांतल्या दरेका खातीर पुस्तकां उपलब्ध करून दिवपा खातीर तुमी तुमच्या थळाव्या वाचपघराक देणगी लेगीत दिवंक शकतात.
दरेक वर्सा संवसारीक पुस्तक दिसाच्या दिसा वेगळ्या वेगळ्या कार्यावळींचें आयोजन करतात. कांय कडेन पुस्तकांचें प्रदर्शन आसता जाल्यार कांय कडेन वाचपघरांत एक दीस फुकट पुस्तकां वाचपाक दितात. कांय कडेन जाल्यार फुकट पुस्तकांची विक्री करतात. तशेंच आपल्या इश्ट इश्टिणीं कडल्यान आपल्या आवडट्या पुस्तकांची देवाण-घेवाण लेगीत करतात.
वैयक्तीक नदरेन सर्वसामान्य मनीस खर्चीक पुस्तकां खरेदी कूंक शकनात. ते खातीर भौशीक वाचपघरां हो मोटो पर्याय आसा. खूबशा शारांनी अशीं वाचपघरां आसात. पालकांनी भुरग्यांक ल्हानपणा सावन पुस्तकांची आवड निर्माण करूंक जाय. ल्हान आसतना तांकां प्राणी, सुकणीं हांच्यो काणयो खूब आवडटात. तातूंतल्यान तांचें सामान्य ज्ञान आनी चौकस बुद्धींत वाड जाता. व्हड व्हड फुडाऱ्यांच्या चरित्रांचें वाचन करीत जाल्यार तांचें व्हडपण आमकां कळून येता. खूबशा शाळांनी लेगीत वाचपघरां आसात. ताचो वापर भुरग्यांनी करूंक जाय. ते नदरेन शिक्षकांची भुमिका खूब मोटी आसा. तांकां भुरग्यांक वाचनाची संवय लावंक जाय. हालींच्या दिसांनी भुरग्यांच्या हातांत मोबायल सदांच आसता. ताका लागून तांची पुस्तकां कडेन आडनदर जाता.
भारतरत्न डॉ. बाबासाहेब आंबेडकर हांचो पुस्तक संग्रह खूब व्हड आशिल्लो. खूबश्यो पदव्यो मेळोवन नामनेक पाविल्ले श्रीकांत जिचकर हांचो लेगीत पुस्तक संग्रह खूब व्हड आशिल्लो. भारताचे आदले उपप्रधानमंत्री यशवंतराव चव्हाण हांकां लेगीत पुस्तकांचें पिशें आशिल्लें. तांच्या पुस्तक संग्रहांत खूबशीं पुस्तकां आशिल्लीं. नवीं पुस्तकां प्रकाशीत जालीं की ते राजकारणाच्या धांवपळींत लेगीत वाचून काडटाले. कांय दिसां पयलीं महाराष्ट्रांतल्या सातरा जिल्ह्यांत भिलार हांगा महराष्ट्र सरकारान पुस्तकांचो गांव स्थापन केला. हें आवर्जून पळोवचें आनी पुस्तकांची आवड निर्माण करची.
ह्या संवसारीक पुस्तक दिसा लोकांक वाचनाची आवड निर्माण करप, पुस्तकांचो सन्मान करप आनी तांचो सांबाळप करप ही कामां करतात. हालींच दूरचित्रवाणी, मोबायल, टॅब ह्या सारक्या साधनांनी ज्ञानाचें विश्व बदल्लां. ताका लागून भुरग्यांचें आनी पालकांचें लक्ष पुस्तकां कडेन उणें आसा काय कितें? असो दुबाव दिसूंक लागला. पूण तें खरें न्हय. आयजूय खूबशा साहित्य संमेलनांनी लाखांनी रुपयांची पुस्तकां विक्रेक वतात. खूबशे वाचक भुरग्यांक पुस्तकां घेवन दितात. गिमाळे सुटयेंत खूबशा वर्गांनी पुस्तकांचें म्हत्व भुरग्यांक सांगतात. एकूणच ग्रंथ चळवळ पातळूंक जाय आनी ताचे फायदे सगल्यां मेरेन पावूंक जाय. अशें जायत जाल्यार हो संवसारीक पुस्तक दीस खऱ्या अर्थान फळादीक जातलो.
शांताराम वाघ
96234 52553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
