भांगरभूंय | प्रतिनिधी
लाखांनी रुपयांचे संपत्ती परस पुस्तक ही मोलादीक संपत्ती हें आमी विसरूंक फावना.
पुस्तक म्हणजे भांडार. पुस्तक जायत्या लोकांचें इश्ट. तांचे जिणेचो तो वेगळांव नज असो घटक. पुस्तक अर्थांत दुकानांनी मेळटात. आतां आॅनलायन पसून मागोवपाक मेळटात. शेंकड्यांनी लोकाक सदांच पुस्तकाचीं दोन तरी पानां वाचपाची संवय आसता. वाचले बगर तांचो दीस बरो वचना. जशी सकाळची एक कप च्या जाय, तशी दिसपट्टी तांकां कितें ना कितें वाचपाची इत्सा जाता. 23 एप्रीलाक संवसारीक पांवड्याचेर पुस्तक दीस मनयतात.
पुस्तक ही वस्तू न्हय, तर तो एक मोलादीक खजिनोच. आमच्या जिविताक वेगळें मोडण दिवपाचें काम पुस्तक करता. ते वाचतकच मनशाच्या मनांत बदल घडून येतात. पुस्तकां आमच्या विचारांक योग्य दिशा दाखयतात. लाखांनी रुपयांचे संपत्ती परस पुस्तक ही मोलादीक संपत्ती हें आमी विसरूंक फावना.
आयच्या धकाधकीच्या काळांत पुस्तकाचें म्हत्व आसा. विद्या मेळोवपाचें सगल्यांत सादें साधन म्हणजे पुस्तक. तें सदांच वाचल्यार मनीस घडटा. पुस्तक हो ताचो खरो इश्ट. जगाचें खरें दर्शन, सदच्यो घडामोडी, अणभव, जिवितांतले वायट, बरे धडे फक्त पुस्तकूच दिवंक शकता.
पुस्तक वाचतना बरीं- बरीं पुस्तकां वाच्चीं. वाचनाक लागून आपलें गिन्यान वाडटा. तें आमकां जिवितांत जगपाक उपेगी पडटा. थोर व्यक्ती, तांचें कार्य, तांणी काडिल्ले त्रास, समाजसेवा हांची म्हायती मेळटा. ते पसून स्फूर्त घेवन तुमी घडटा. फकत मनीसूच कळना, तर सामान्य ज्ञानूय मेळटा. सुकणीं, प्राणी हांची म्हायती मेळटा.
सदांच पुस्तक वाचप ही सामकी बरी गजाल. आपलें सदचें काम करून मेळिल्ल्या वेळांत पुस्तकाचीं पांच- स पानां चुकनासतना वाचप बरें. जेन्ना मनीस एकलोच आसता, तेन्ना पुस्तक ताका साथ दिता. ताण- तणाव, हुस्को पयस करता. पुस्तक वाचप भलायकेक बरें. ते संस्कार करता. सकारात्मक बदल घडोवन हाडटा. रातच्या वेळार न्हीद येता म्हणसर पुस्तक वाचप बरें. वाचता- वाचता झेम येवपाची किमया कांय पुस्तकां करतात. पुस्तक म्हणल्यार जादू हें आमी विसरूंक फावना.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
