भांगरभूंय | प्रतिनिधी
अॅड. सुभाष देसाय: केपेंच्या नगर वाचनालयांत मनयलो पुस्तक दीस
केपें: आयचें युग म्हळ्यार गिन्यानाचें युग. गिन्याना वरवीं मनीस संवसाराच्या खंयच्याय मळार फुडें वचूंक शकता. पुस्तकां आनी हेर वाचन साहित्य आशिल्लें घर काळखांत केन्नाच भटकचें ना, अशें मत आदले सरकारी अधिकारी अॅड. सुभाष पंढरी देसाय हांणी उक्तायलें. ते केपें नगर वाचनालयांत आयोजीत केल्ल्या पुस्तक दीस कार्यावळीक मुखेल सोयरे म्हणून उलयताले.
ह्या वेळार वाचनालयाचे मुखेल ग्रंथपाल दत्तराज प्रभूदेसाय, साहित्यीक डॉ. जयंती नायक, डॉ. अशोक मानगुटकार, डॉ. प्रमदा उज्वल गांवस देसाय आनी हेर मानेस्त हाजीर आशिल्ले. मानेस्तां हस्तुकीं पुस्तक दीस सुवाळ्याचें उक्तावण जालें.
विद्यार्थ्यांचे उदरगती खातीर वाचन गरजेचें आनी ताका लागून तांचे जिणेची बुन्याद घट्ट जाता. मोबायल फोना परस पुस्तकां कडेन इश्टागत करात. आपल्या दिसाची सुरवात वाचनांतल्यान करची. आपले कुडींतली आलमारीक पुस्तकांनी सजोवचें अशें अॅड. देसाय हांणी फुडें सांगलें.
कार्यावळीचे अध्यक्ष सुवातेर प्रा. आशा मानगुटकार आशिल्ली. अॅड. वल्लभ गांवस देसाय, उज्वल गांवस देसाय, जेस फेर्नांडीस, अंबेश तलवडकार, डॉ. जयंती नायक, साईश खोलकार, प्रल्हाद नायक, पोब्र फेर्नांडीस, एकनाथ गांवकार, प्रमदा गांवस देसाय, अॅड. सुभाष देसाय हांणी आपल्यो कविता सादर केल्यो.
ग्रंथालयाचे कर्मचारी संदेश गांवकार, सोनिया डिकॉस्टा आनी प्रकाश साळुंके हांचें सहकार्य मेळ्ळें. ह्या वेळार ज्येश्ठ पत्रकार सुशांत कुंकळयेंकार आनी हेर साहित्यिकांचो भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
