पुष्पा अखेरेक बागवलो

भांगरभूंय | प्रतिनिधी

दक्षीणेक सिनेमा अभिनेत्यांची क्रेझ आसा, तितली हेर खंयच पळोवपाक मेळची ना. हिंदी सिनेमासृश्टींत फक्त राजेश खन्नाक तो मान मेळिल्लो.

सध्याचो सगल्यांत चड चर्चेंत आशिल्लो नट म्हणल्यार अल्लू अर्जून. ‘पुष्पा’ सिनेमाच्या हिंदी आवृत्तीक लागून देशभरांतले सिनेमा रसीक ताका वळखूंक लागले. हालींच ‘पुष्पा 2 : द रुल’ थेटरांनी लागला. तोय सुपरहीट जाला. हो तेलुगू सिनेमांतलो सुपरस्टार काल अडचणींत सांपडलो. ताका न्यायालयान 14 दिसांची न्यायालयीन बंदखणीची ख्यास्त दिली. सकाळीं अटक जातकच ताणें ख्यास्ती आड तेलंगण उच्च न्यायालयांत याचिका घाली. सांजवेळा ताका अंतरीम जामीन मेळ्ळो. हे अटके फाटली फांटभूंय अशी- 4 डिसेंबराक हैदराबादच्या संध्या थेटरांत प्रिमियर शो दवरिल्लो. लोकांची घे म्हूण गर्दी. इतल्यान खुद्द अल्लू थंय पावलो. तो आयला हें कळटकच शेंकड्यांनी रसीक ताका पळोवपाक धांवत सुटले. तेन्ना खेटाखेट जावन एके 35 वर्सांचे बायलेक मरण आयलें. तर तिचो पूत गंभीर जखमी जालो. ते बायलेच्या कुळाराच्या लोकांनी अल्लू आड कागाळ केल्ली. पुलिसांनी भारतीय न्याय संहितेच्या कलम 105 (सदोश मनीसवधा खातीर ख्यास्त) खाला गुन्यांव दाखल केल्लो. तशेंच कलम 118 य (जाणूनबुजून हेरांक जखमी करप) लायिल्लें. झुकेगा नहीं साला, म्हणपी पुष्पाक अखेरेक कायद्या मुखार बागवचें पडलेंच.
दक्षीणेक सिनेमा अभिनेत्यांची क्रेझ आसा, तितली हेर खंयच पळोवंक मेळची ना. हिंदी सिनेमासृश्टींत फक्त राजेश खन्नाक तो मान मेळिल्लो. पूण रोमेंटीक हिरो म्हूण. खास करून चलयो ताका पळोवन पिश्यो जाताल्यो. मात, दक्षीणेच्या अभिनेत्यां खातीर (एखादी अभिनेत्री आडवाद आसत) दादले, बायलो, तरणाटे, चलयो, भुरगीं सगलींच सरभोंवतणचो संवसार विसरतात. तातूंत तांकां आवय भाशेचो खूब मोग. म्हणटकच आपल्या नटाक, सिनेमाक, संगीताक ते खूब मान दितात. सिनेमा कुटुंबीक आसूं वा हिंसक दक्षीणेंतले रसीक ताचेर उडयोच मारतात. नट राजकारणांत देंवले तेन्ना ह्या ग्लॅमराच्या आदाराचेरूच तांकां येश मेळ्ळें. हिंदी वा हेर सिनेमासृश्टींतल्या नटांक तें अजून तरी मेळूंक ना. सिनेमा अभिनेते मरतात, तेन्ना दक्षीणेंत तीग- चौग जाण तरी आत्महत्या करतात. हाचे वयल्यान तांकां सिनेमाचें, नटांचें कितलें आकर्शण आसतलें, ताची फक्त कल्पना करची. आकर्शण म्हणचे परस ही पिशेंपणाच म्हणचीं पडटलीं!
पुष्पा सिनेमाचे हे दुसरे आवृत्तीन संवसारभरांत एक हजार कोटी रुपयां वयर गल्लो जमयला. तोय आठ दिसां भितर. अल्लू ह्या वर्साचो सगल्यांत चड जोडपी कलाकार थारला. खेटाखेटीचे घडणुकेक अल्लू अर्जून जापसालदार काय ना, हाचेर आतां वाद सुरू जाला. मजगतीं, ते बायलेच्या घोवान अल्लू आडची कागाळ फाटीं घेवपाक हांव तयार आसा, अशें म्हणलां. ते घडणुके कडेन अल्लू अर्जूनाचो कांय संबंद ना, अशेंय ताणें सांगलें. हालींच अल्लून बायलेच्या कुटुंबाक आपूण 25 लाख रुपयांची मजत करतलों, अशें ट्विट केल्लें. चूक मागिल्ली. आतां पुलिसांनी कायद्या प्रमाण पावलां उडयलीं आनी ताका अटक केली. उच्च न्यायालयान सोडलो तरी ही केशीचे पडसाद कांय दीस तरी उठ्ठलेच. अल्लू अर्जूनान सिनेमाच्या पयल्या खेळाक वच्चें न्हय, अशें ताका सांगिल्लें. गेलो तरी भेस बदलून वचपाचें. मात ताणें कोणाचेंच आयकलें ना. आपूण येतलों अशें ताणें सिनेमा थेटराच्या धनयांक कळयिल्लें खंय. म्हणटकच पुलिसांनी बंदोबस्त करपाचो, अशें थोडे म्हणटात. पूण ही बातमी भायर फुटली आनी सिनेमा पळोवपाक आयिल्ले ताचे दुपेटीन थंय लोक जमले. अल्लू येतकच साहजिकूच ताका पळोवपाक ते धांवले आनी गचमुड्डी जाली. तातूंत ते बायलेक मरण आयलें. हें वाचून लोक नेमके कशे धांवल्यात आसतले, ताचें चित्र दोळ्यां मुखार येता. हे घडणुकेक तसो अल्लूय जापसालदार आसा. ताका नटां विशीं लोकां मदीं कितलीं पिशेपणां आसता, तें खबर आसतलेंच. तरीय लोकांचीय तातूंत चूक आसा. ताचे परस इल्ली चडूच म्हणल्यार जाता. आमी सगले भारतीय अभिनेतो, क्रिकेटर वा फाम आशिल्लो खंयचोय मनीस आयलो काय तन, मन विसरून ताका पळोवपाक धांवतात. मागीर मनीस म्हूण लायकी नाशिल्ली ती लोकप्रीय व्यक्ती आसूं. गाजपी नट सोडाच, तांच्या ल्हान भुरग्यांचे पसून फोटो, व्हिडियो काडपाक देशांतले काय सिनेपत्रकार, सोशल मिडिया फोटोग्राफर अक्षरशा बाबा प्लीज, मॅडम प्लीज करीत तांचे कडेन भीक मागतना दिसतात. मजेची गजाल म्हणल्यार तांकां सोशल मिडियाचेर हजारांनी लायक्स, शेंकड्यांनी शॅर मेळटात. ते नट, तांची भुरगीं मात ह्या फोटोग्राफरांक वाजेल्लीं दिसतात. कोणा फाटल्यान धांवचें हें कोण दुसऱ्याक सांगपाक शकना, पूण धांवप्यांनी निदान खेटाखेटी, व्हडल्यो दुर्घटना जावच्यो नात, हाची जतनाय घेवंक नाका?