भांगरभूंय | प्रतिनिधी
आनीक 20 स्टेशनांक रोखडेच लॅपटॉप दिवपाची घोशणा
पणजी: मुंबयच्या पुष्पम ज्वेलर्सान ‘सीएसआर’ खाला राज्यांतल्या 31 पुलीस स्टेशनांक शुक्रारा उंचेल्या दर्जाचे लॅपटॉप दिले. तशेंच फुडारांत आनीक 20 स्टेशनांक अशेच तरेचे लॅपटॉप दितले अशी घोशणाय तांणी केली.
पर्वरे मंत्रालयांत शुक्रारा जाल्ले कार्यावळींत मुख्यमंत्री डॉ. प्रमोद सावंत हांचे सयत मंत्री सुभाष फळदेसाय, अतिरिक्त पुलीस म्हासंचालक ओमवीर सिंग, पुष्पम ज्वेलर्साचे धनी वैभव आनी प्रियांका काकर आदीं मानेस्त हाजीर आशिल्ले.
विवीध प्रकारच्या गुन्यांवांचो तपास लावपा खातीर पुलिसांक उंचेल्या दर्जाच्या लॅपटॉपाची गरज भासत आसता. तेच फाटभुंयेर आमी 31 पुलीस स्टेशनांक हे लॅपटॉप दिल्यात आनी फुडल्या कांय दिसांनी आनीक 20 पुलीस स्टेशनांक लॅपटॉप दितले अशें वैभव काकर हांणी सांगलें.
करियरा विशींच्या पुस्तकाचें प्रकाशन
‘विकसीत भारत-विकसीत गोवा 2047’ उपक्रमाचो भाग म्हूण उच्च शिक्षण खात्यान बारावी उपरांतच्या करियर, परिक्षा आनी शिश्यवृत्ती विशीं तयार केल्ल्या पुस्तकाचेंय मुख्यमंत्री डॉ. प्रमोद सावंत हांचें हस्तुकीं शुक्रारा प्रकाशन केलें. विवीध मळां वेल्या दोनशे परस चड करियर पर्यायांची म्हायती ह्या पुस्तकांत दिल्या. बारावी पास जावपी विद्यार्थ्यांक ह्या पुस्तकाचो मोटो फायदो जातलो अशें मुख्यमंत्री डॉ. प्रमोद सावंत हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
