भांगरभूंय | प्रतिनिधी
पणजी: कुशावती जिल्ह्यांतल्या पुलीस स्टेशनांनी सीसीटीव्ही कॅमेरा उपकरणांचेर देखरेख दवरप, तांची देखभाल करप हे वरवीं पुलीस स्टेशनार मानवाधिकारांचें उल्लंघन जायनाशिल्ल्याची खात्री करप आदीं कामां खातीर जिल्हो पांवड्यार समितीची स्थापणूक केल्या. समितींत महसूल खात्याचे सचीव, जिल्हो न्यायदंडाधिकारी, जिल्हो पुलीस अधिक्षक आनी नगरपालिका अध्यक्ष हांचो आस्पाव आसा. हे विशीं गृह खात्यान हालींच अधिसुचोवणी जारी केल्या.
अधिसुचोवणे प्रमाण, सर्वोच्च न्यायालयाच्या एका आदेशा प्रमाण ह्या समितीची स्थापणूक केल्या. समिती जिल्ह्यांतल्या सगल्या पुलीस स्टेशनांतले सीसीटीव्ही कॅमेरे कार्यरत आशिल्ल्याची खात्री करतले. हेविशीं समिती संबंदीत पुलीस निरिक्षका कडेन वेळावेळार चर्चा करतली. जिल्हाे समिती राज्य पांवड्या वेले समितीक म्हयन्याचो अहवाल दितली. हातूंत सीसीटीव्ही आनी ते संबंदीत उपकरणांची स्थिती आदींची म्हायती आसतली.
जिल्हो समिती पुलीस स्टेशनांतली सीसीटीव्ही फुटेज तपासतली. एखाद्या पुलीस स्टेशनार मानव अधिकाऱ्यांचें उल्लंघन जालां आनी ताची म्हायती उक्तडार आयली ना हाची म्हायती लेगीत जिल्हो समिती घेतली.
तशेंच समितीक परमवीर सिंग सैनी आड बलजीत सिंग ह्या खटल्यांत सर्वोच्च न्यायालयान दिल्ल्या सगल्या आदेशां कडेन पाळो दितले हाची खात्री करची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
