भांगरभूंय | प्रतिनिधी
सर्वोच्च न्यायालयान उक्तायलो हुस्को
नवी दिल्ली, खबरां संस्था: देशभरांतल्या पुलीस स्टेशनांनी सीसीटीव्ही कॅमेरे काम करिनाशिल्ल्यान सर्वोच्च न्यायालयान हुस्को उक्तायला. न्यायालयान हाका देखरेखीचो उणाव म्हणलां आनी कॅमेर्यांचें फीड पळोवपाक एक नियंत्रण कूड आसची, जंय मनशाचो हस्तक्षेप जावचो ना, अशें म्हणलां. जर खंयचोय कॅमेरा काम करपाचें बंद केल्यार बेगोबेग अलर्ट मेळपाक जाय. न्यायालयान २६ सप्टेंबराक ह्या प्रकरणांत आपलो आदेश दितले अशें म्हणलें.
न्यायमुर्ती विक्रम नाथ आनी न्यायमुर्ती संदीप मेहता हांच्या खंडपीठान सांगलें, दरेका पुलीस स्टेशनाची तपासणी स्वतंत्र एजन्सीन करची. न्यायालयान अशें सुचयलां, ह्या कामा खातीर आयआयटीक वाटेकार करून घेवपाक शकता, जे अशे सॉफ्टवेअर तयार करपाक शकता जाका लागून सगले सीसीटीव्ही फीड एआय वरवीं एकेच कडेन स्वयंचलितपणान निरीक्षण करपाक मेळटलें.
जर खंयचोय कॅमेरा बंद आसल्यार ताची म्हायती संबंदीत कायदेशीर सेवा प्राधिकरण वा देखरेख एजन्सी मेरेन बेगोबेग पावोवपाक जाय, अशें न्यायालयान म्हणलें.
२०१८ आनी २०२० वर्सा म्हत्वाचे आदेश दिल्ले. २०१८ वर्सा, सर्वोच्च न्यायालयान मानवी हक्क नेम मोडिल्ल्यान ते आडावपाक पुलीस स्टेशनांत सीसीटीव्ही कॅमेरे बसोवपाचे आदेश दिल्ले. डिसेंबर २०२० वर्सा, न्यायालयान म्हणिल्लें, दरेक पुलीस स्टेशनाच्या प्रवेश-निर्गमन बिंदू, लॉकअप, कॉरिडॉर, येवकार लॉकअपाच्या भायर कॅमेरे बसोवचे.
ह्या कॅमेर्यांत नायट व्हिजन आसचें आनी तें ऑडिओ आनी व्हिडिओ रेकॉर्ड करपाक शकतलें. तशेंच, तांचो डेटा उण्यात उणो एक वर्स सुरक्षीत दवरपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
