भांगरभूंय | प्रतिनिधी
कायदो आनी सुवेस्था इबाडची न्हय, गुन्यांव जावचे न्हयआनी गुन्यांव करतल्यांक ख्यास्त मेळोवन दिवन आमच्या
समाजांत शांती हाडपाचें काम पुलिसांचें. मात पुलिसूच जर ‘सेवें’त रुजू जातना घेतिल्लो सोपूत विसरले आनी प्रामाणिकांक सोडून गुन्यांवकारांच्या हातांत हात घालून भोंवपाक लागले जाल्यार, तांच्या ह्या कृत्याचेर बडी बसपाकच जाय. पूण गोंया सारक्या ल्हान राज्यांत, राजकारण्यांच्या आशिर्वादान कायदो मोडपी ख्यास्त जायनासतना सुट्टात!
आतां सगल्याच राजकारण्यांक आनी पुलिसांकूय एके तागडेंत जोखप समा जावचें ना. कांय पुलीस, जांचेर घरांत बरे संस्कार जाल्ले आसतात, ते आपल्या तत्वां आड वचून पुलीस सेवेंतलो सोपूत तोडिनात. तशेंच समाजांत शांती हाडपाचो यत्न करपी राजकारणीय पुलिसांच्या भेसांत चोरांक, गुंडांक, आनी गुन्यांवकारांक पळोवंक शकनात.
आम आदमी पक्षाचे बाणावलीचे आमदार वेन्झी व्हियेगश हांणी पोरूं पावसाळी अधिवेशनांत एक पुलीस कॉन्स्टेबल चोरांक सांगाताक घेवन चोरयो करता आनी वेवसायिकांक लुट्टा असो आरोप केल्लो. ते उपरांत पुलीस कॉन्स्टेबल विकास कौशीक हाका सेवेंतल्यान निलंबीत केल्लो. गोंयांतली गुन्यांव सोदून काडपाची टक्केवारी चड आसा अशें मुख्यमंत्री प्रमोद सावंत सांगत आसतात. पूण गुन्यांवकारांक ख्यास्त दिवपाचेर पुलिसांनी भर दिवंक जाय आनी हाचो आंकडो वाडपाक जाय. पुलिसांनी गुन्यांवकारां वांगडा हातमेळोवणी करून जर केस सदळ केली जाल्यार लोकांक न्याय मेळचो ना, वयल्यान गुन्यांवकारांक जल मेळटलें. पुलिसांचो आपल्याचेर आशिर्वाद आसा म्हूण तो गुन्यांव करीत रावतलो. अशें जल मेळचें न्हय म्हूण विरोधकांतले आमदार आवाज काडपाक लागल्यात.
गोवा फॉरवर्ड पक्षाचे आमदार विजय सरदेसाय हांणी पुलिसांची लक्तरां भायर काडटना अश्यो केशी सभाघरांत उलोवन दाखयल्यो, त्यो आयकल्लो खंयचोच व्यक्ती पुलिसांचेर विस्वास दवरचो ना. एक पुलिसूच जेन्ना आपले धुवेचेर विनयभंग जाल्ल्याची कागाळ करता आनी त्या पुलीस स्टेशना वयलो पुलीस उपनिरिक्षक हातूंत हात आशिल्ल्या गुन्यांवकाराक साल्वार करपाचो यत्न करता, तेन्ना आमच्या पुलिसांची ‘लायकी’ कळटा. अशें आयकतकच पुलिसांचेर कोण विस्वास दवरतलो? आमचें सरकार महिलांचे सुरक्षेचें उतर दिता आनी हांगां सरकाराचो सेवक, तो पुलीस उपनिरिक्षक गुन्यांवकाराक मजत करून आनीक विनयभंग करपाक ताका मेकळो सोडटा! ही पुलीस खात्याक फकत लजेची गजाल न्हय, तर हो दाग केन्नाच पुसून वचचो ना. विजय सरदेसाय हांणी सांगिल्लें प्रमाण हो प्रकार जाला जाल्यार, सरकारान ताचो तपास करून ‘वर्दींतल्या’ ह्या गुन्यांवकाराक निलंबीत करचो आनी घर खातें जें प्रदुशीत जालां तें निवळ करचें. कसलोच खर्च करिनासतना हें प्रदुशण पयस करूंक मेळटा आनी सत्याचे ‘लाडू’ समाजाक दाखोवपाक तरी मेळटात. घुंवळे वखदांचें प्रकरण पॉक करता म्हूण सांगून आनीक एका पुलीस उपनिरिक्षकान, एका तरणाट्याच्या कुटुंबा कडल्यान लाखांनी रुपया कशे मागले तिवूय गजाल सरदेसाय हांणी सांगली.
वेवसायान एसी मॅकानीक आशिल्ल्या गुन्यांवकारा कडल्यान आनीक एका पुलीस उपनिरिक्षकान आपल्या घरा एसी बसोवन घेतली अशेंय सरदेसाय हांणी म्हणलां. हाचो अर्थ ह्या गुन्यांवकाराचे परिस्थितीचो फायदो घेवन ह्या पुलिसान कशें तरेन ‘शेण कालयलें’ हें कळटा. गुन्यांवकारां कडेन ‘दोस्ती’ करपी अशा पुलिसांक अशेच मेकळे सोडप? फाटल्या जुलयांत एक कामगार लोटले वांठारांत मेल्ले स्थितींत सांपडलो. फोंड्यां रावपी ह्या कामगाराक फोंडेंच्या पुलिसांनी आपल्याक ‘कटकट’ नाका म्हूण मायणा कुडटरी पुलीस स्टेशनाच्या अधिकार क्षेत्रांत व्हरून सोडिल्लो. ह्या प्रकरणांत तिगा पुलिसांचेर कारवाय जाली. हो कामगार मरतकच ह्या प्रकरणाक वाचा फुटली, नाजाल्यार ह्या तिगांय पुलिसांक तांचो गुन्यांव पचपाचो.
आपलो बापूय संवसाराक अंतरिल्ल्याच्या दुख्खांत आशिल्ल्या एका अप्लवयीन भुरग्याक एक व्यक्तीन फोंडें पुलीस स्टेशनार महिला पुलिसां मुखार मारपाची धमकी दिली. ह्या व्यक्तीन त्या भुरग्याचेर सुणें सोडिल्लें. इतलो गंभीर प्रकार आसून लेगीत ही महिला पुलीस हें प्रकरण नोंद करपाक सोदिनाशिल्ली. ती तें थंयच्या थंय दामून उडोवपाक पळयताली. उपरांत त्या भुरग्यान ज्येश्ठ पुलिसांक ते विशीं बरयतकच ही केस नोंद जाली. गुन्यांवाची फाटभूंय आशिल्ल्यांक पुलीस साल्वार कित्याक करपाक सोदतात? तांकां कितें तरी सुट्टा म्हणूनच न्हय? नाजाल्यार ओगीच तांची ‘लायफस्टायल’ गिरेस्त जायना.
कोणाच्याय घराचेर जर गूंड येवन अतिक्रमण करपाक लागले, आनी कागाळदाराक मजत करपाचे सोडून पुलीस गुन्यांवकाराक मजत करपाक लागले, जाल्यार हे पुलीस सेवेंत कितें अर्थ आसा. “तो गूंड तुका त्रास करता मरे, मागीर तुजें घर ताकाच विकून उडय” अशें जर खंयच्याय पुलीस निरिक्षकान खंयच्याय कागाळदाराक सांगलां, जाल्यार ताणें स्वताक पुलीस म्हणनासातना आपुणूय गुंडाचेच कालेतीचो म्हणचो आनी राजिनामो दिवचो. पुलिसांचे अशे शेंकड्यांनी प्रकार आसतले. फकत ते बनावट केस करून भितर उडयत ह्या भंयान लोक तोंड उगडनात. पुलीस घुंवळे वखदां वेव्हाराक उर्बा दितात अशेय आरोप साबार फावटी जाल्यात. कांय पुलिसांचेर खात्या खाला तपासूय जाता आनी मागीर तांकां ‘क्लीन चिट’ मेळटा. गुन्यांव करूनय जर तांकां ‘धुवन’ काडले जाल्यार ते परत म्हेळे जावपाचे रावतले?
कांय वर्सां आदीं एकाच घरांतल्या दोगा भावंडांक, सत्तेर आशिल्ल्या एका राजकारण्याच्या आदेशान, घुंवळे वखदां प्रकरणांत धरिल्लीं. ‘तांकां मात्शे घुस्पयात’ म्हूण आदेश येतकच गांजा बरोबर ‘कॅमिकलां’य दाखोवन तांकां जामीन मेळचो ना हाची खबरदारी पुलिसांनी घेतिल्ल्याचो बोवाळ तांचो बापूय घालतालो. घुंवळे वखदां वेवसायांत आशिल्ल्या ‘काणेरा’च्या सांगण्या वयल्यान हालींच फोंड्यांय अशेच तरेन एका तरणाट्याक त्रासांत घाल्ल्याचें लोक उलयतात. म्हणल्यार गुन्यांवकारांच्या तालाचेर आमचे पुलीस नाचतात? आसगांवच्या ‘घर मोडतोड’ प्रकरणांत वरिश्ठ पुलीस अधिकारी आशिल्ल्याची वावडी आशिल्ली. ताची बदली जाय मेरेन एका वरिश्ठ फुडाऱ्यान ह्या आरोपांचेर ‘ब्र’ लेगीत काडलें ना. आनीक एका वरिश्ठ अधिकाऱ्याचेर उत्तर गोंयच्या क्लबांत महिले कडेन फाजीलपणां केल्ल्याचो आरोप आशिल्लो. ताचीय बदली जाल्या. सामान्य लोकांचेर पुलीस केशी बी जातात, तशी हांचेर जायना काय? बदली केली म्हणटकच ते केल्ल्या गुन्यांवांतल्यान सुटले!!!
गुन्यांवकारी वृत्ती आशिल्ल्या पुलिसांक लागून, पुलीस खात्याचें आनी सरकाराचें नांव पेड्डेर जाता. काल पयर पुलीस सेवेंत रुजू जाल्ले पुलीस जर आपल्या अधिकारांचो गैरवापर करून लोकांक बूट चाटपाक लावंक लागले जाल्यार पुराय यंत्रणेची दशा जाल्या अशें म्हणल्यार अतिताय जावची ना.
हे खातीर ते कायद्या परस व्हडले न्हय, हें तांकां दाखोवन दिवपाची गरज आसा. नाजाल्यार गुन्यांवाची पोसवण करपी हे पुलीस व्हडल्या पदांचेर पावतकच कोणाचीं घरां मोडीत आनी मातयेभरवण करीत हें सांगपाक जायना. नव्यान भरती जाल्ल्या पुलिसांची ‘पासींग आवट परेड’ 24 फ्रेब्रुवारी दिसा वाळपय जाली. त्या वेळार मुखेलमंत्र्यान आपल्या भाशणांतल्यान पुलिसांक उलो मारिल्लो की तांणी घेता तो सोपूत पाळचो आनी आपल्या गणभेसाक (वर्दी) दाग लागपाक दिवचो न्हय म्हूण. हाचो अर्थ मुखेलमंत्र्याकूय आपल्या खात्यांत कितें चल्लां तें खबर आसा. राजकारण्यांचो हस्तक्षेप कुशीक दवरून तांचेर कायद्याची बडी मारपाक मुखेलमंत्र्याक जमत?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
