पुलीस यंत्रणेंतली वायट प्रवृत्ती हुमटावप गरजेची

भांगरभूंय | प्रतिनिधी

दिश्टीकोन

–

रोजां विकपाक बसपी हे बिगर गोंयकार आपले फामिलेक पोसपा खातीर कश्ट काडटात आनी तांच्या ह्या कश्टांनी कमयिल्ले पयशे जर कोणूय राकेस येवन व्हरता, जाल्यार समाजान राम वा कृष्ण जावचो पडटलो.

गोंय आदलें सारकें उरूंक ना. गोंयकार कामाच्या सोदांत दुसऱ्या राज्यांनी, विदेशांत वचपाक लागल्यात आनी हांगां हेर राज्यांतले कामगार येवंक लागल्यात. चडशे उत्तर भारतांतले, कर्नाटक आनी महाराष्ट्रांतलेय. आमचे चडशे वेवसाय, म्हणल्यार भाजयो विकप, फळां विकप आनी मुखेल वेवसाय नुस्तें विकपाचो. हे सगले तांणी ओडून घेतल्यात. म्हणल्यार आमी कुशीक सरले आनी तांणी तो घेतलो. 

इतलेंच कित्याक, नळ सारको करपी, लायटीचें काम करपी, घरां बांदपी, फर्निचर करपी, शटरांचें मॅन्टेनन्स करपी, टायल्स घालपी… हीं सगळीं कामां करपी भायलेच. आमचे पारंपरीक वेवसाय तांचे कडेन गेल्यात. पाव करपाक केरळांतले लोक आयल्यात. विकपाक युपी- बिहारी. हे सगळे गोंयांत आयल्यात तेन्ना तांचे खातीर राबित्याची सुवातय जाय. ती आमचे गोंयकार तांकां आपल्या घरांतले रुम बिराडाक दिवन भाडें घेतात आनी आयतो पयसो मेळयतात. पूण भायल्या राज्यांतल्यान हांगां रावपी हे कामगार सगळेच बरे आसतात अशें ना. कांय जाण गुन्यांव करून पळून आयिल्ले आसतात आनी हांगांय मागीर ते आपल्या सभावा प्रमाणें वागतात. 

जेन्ना जेन्ना खंयच्याय गुन्यांवांत बिगर गोंयकार सांपडला, तेन्ना तेन्ना मुख्यमंत्री प्रमोद सावंत हांणी भाड्यान रुम दिवपी गोंयकारांक तांची पडताळणी पुलीस स्टेशनाचेर करपाक सांगल्या. हालीं तांणी ही गजाल खुबूच गंभीरतायेन घेवन जे लोक पडताळणी करपाक अपेशी थारतात, तांचेर कारवाय करपाचीय भाशा उलोवन दाखयली, हे खातीर बिगर गोंयकारांची पुलीस स्टेशनांचेर गर्दी जावंक लागली. ही पडताळणी प्रक्रिया फुकट आसतली आनी कोणाकूच पयशे भरचे पडचे नात अशें सरकारान सांगिल्लें. तरीय कांय पुलीस दरेके व्यक्ती फाटल्यान 100 ते 500 रुपये घेतात अशे कथीत आरोप जावंक लागले. 

आम आदमी पक्षाचे अध्यक्ष अमित पालयेकार हांणी असो आरोप करतकच, वरिश्ट पुलीस अधिकारी जागे जाले आनी तांणी हे घडणुकेची चवकशी करतले अशें सांगलें. पुलीस पयशे मागतात हे विशीं कागाळ कोणेंच करूंक ना. पूण आमी तपास करतात अशें पुलिसांनी म्हणलां. खरेंच जर कोणेंय पयशे मागल्यात जाल्यार तो ह्या प्रकरणांत सांपडूं आनी जाका लुटला त्या गरीब बिगर गोंयकाराक न्याय मेळूं. 

पयशे मागपाचें हें प्रकरण, पुलिसांचे चवकशी फायलींत पावता थंय आसा, एक पुलीस कॉन्स्टेबल दोन चाकीचेर रोजांची व्हड पिशवी दवरून रोजां विकतल्या बिगर गोंयकारा कडेन कितलोसोच वगत कितें तरी उलयता हो व्हिडीयो वायरल जालो. व्हिडीयो काडपी पत्रकार मुखार येतकच त्या पुलिसान आपलें हॅल्मॅट घालें आनी प्रस्न टाळ्ळे. उपरांत ताणें फोन करून आपल्या आनीक पुलिसांक आपयले आनी हें प्रकरण थंयचे थंय सोंपोवपाचो यत्न केलो. ताचे साथीदार जे थंय पावले तांणी पत्रकाराक चड म्हायती जाय जाल्यार पुलीस स्टेशनाचेर यो आमी रस्त्या कुशीक बसून फुलां विकतल्यांचेर कारवाय करतात अशें तापट सुरान सांगलें. ताचो चेहरो खरो उलयतालो. बरें त्या पत्रकारान पुलीस वतकच त्या बिगर गोंयकार फुलां विकतल्यांक जेन्ना प्रकरण कितें काय म्हूण विचारलें तेन्ना तांणी सरळ ‘तो’ पुलीस रु 5000 मागतालो अशें सांगलें. हॅल्मॅट वयर सकयल करून दाखय-लिपय करपी पुलीस ड्युटी करतालो काय आपलीं बॉल्सां भरतालो, हाची वरिश्ट पुलिसांनी चवकशी करपाक जाय. पूण वायट प्रवृत्तीक हारोवपाची वृ्त्ती वरिश्टां मदीं आसची पडटली. फुलाची पाकळी तांचे मेरेनय पावता जाल्यार ते चवकशेक कांयच अर्थ उरचो ना. ते ती चवकशी गंभीरतायेन घेवचेच नात. 

हालींसराक गोंय पुलिशेचें नांव इतलें बदनाम जालां की तें निवळ करपाक कसलेंच रसायन वा शाबू लेगीत मेळचो ना. दर दिसा पुलिसांचीं नवीं- नवीं प्रकरणां दिसतात आनी चवकशी करतले अशें म्हणटकच लोक तें विसरून वतात. पूण ताचेर नव्या- नव्या प्रकरणांची भर पडत रावता, ही तांचे खातीर लजेची गजाल.  

वायट कामां करतना, वायट प्रवृत्तीचे पुलीस भिनात ताचे फाटल्यान कारणां वेगवेगळीं आसूं येता. पयलीं म्हणल्यार ते आपल्या वरिश्टांक घट धरून आसतात आनी दुसरें म्हणल्यार राजकी फुडाऱ्यांचो तांकां आशिर्वाद आसता. अशें आसतकच कोण कोणाक भितलो? अशे पेज्जाद पुलीस मागीर फुलकारांक भिवोवपाचे रावतले? वायटाचेर बऱ्याचें जैत मेळोवन आमी दसरो मनयलो. अशा प्रवृ्तीं आड झगडपाक आनी अन्याय जाल्ल्याक न्याय दिवपाक आमी मुखार सरत? 

दसऱ्याच्या दोन- तीन दीस आदीं येवन रोजां विकपाक बसपी हे बिगर गोंयकार आपले फामिलेक पोसपा खातीर कश्ट काडटात आनी तांच्या ह्या कश्टांनी कमयिल्ले पयशे जर कोणूय राकेस येवन व्हरता, जाल्यार समाजान राम वा कृष्ण जावचो पडटलो. कित्याक तर हो राकेस केन्ना कोणाचो घात घेत हें कोणूच सांगूंक शकना. 

समीर नायक

मडगांव