भांगरभूंय | प्रतिनिधी
आयपीएस अलोक कुमार गोंयचे नवे डीजीपी
पणजी, प्रतिनिधी : आसगांवच्या प्रदीप आगरवाडेकार घर मोडपा प्रकरणांत चेंपण घालपाच्या आरोपाक लागून वादग्रस्त थारिल्ले पुलीस म्हासंचालक जसपाल सिंग हांची दिल्लीक बदली जाल्या. तांच्या जाग्यार 1996 च्या पंगडाचे आयपीएस अधिकारी अलोक कुमार हे पुलीस म्हासंचालकपदाचो ताबो घेतले. केंद्रीय गृह मंत्रालयान हो आदेश जारी केला.
आसगांवां प्रदीप आगरवाडेकार हांचें घर बावन्सरांच्या साहाय्यान मोडपाची घडणूक जूनांत घडिल्ली. पूजा शर्मा ही मुखेल संशयित आसा. मुख्यमंत्र्यांनी तपास गुन्यांव फांट्या कडेन दितानाच मुखेल सचिवां कडेन चवकशी करून अहवाल मागलो. पुलीस म्हासंचालकांच्या चेपणाक लागून हांव घर मोडपा प्रकरणात कारवाय करू शकलो ना, असो अहवाल हणजुणचे निलंबित पुलीस निरीक्षक प्रशील देसाय हांणी मुखेल सचिवांक दिल्लो. हाचे उपरांत पुलीस म्हासंचालकांचेर कारवाय करपाची मागणी विरोधी पक्षां कडल्यान जाली. आता पुलीस म्हासंचालक जसपाल सिंग हांचे बदलीचो आदेश जारी जाला.
मजगतीं, पूजा शर्मा हिचो अटकपूर्व जामीन पणजेच्या उत्तर गोंय जिल्हो आनी सत्र न्यायालयान भायर मारिल्लो. ते खातीर तिणें उच्च न्यायालयांत ताका आव्हान दिलां. ताची सुनावणी आयज सांजवेळा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
