भांगरभूंय | प्रतिनिधी
भांगरभूंय । प्रतिनिधी
पणजीः गोंय पुलीस खात्यांतले पुलीस निरीक्षक आनी भारतीय राखीव दलांतले (आयआरबी) निरीक्षकांची निमणी ज्येश्ठता वळेरी जारी केल्या. ताचे वयल्यन गोंय पुलीस आनी आरआयबी निरीक्षक एकमेकां सामकार आयल्यात. पुलीस खात्यांत 2002 वर्सा उपनिरीक्षक म्हणून भरती जाल्ले पुलीस निरीक्षक ज्येश्ठता वेळेरेक मुंबय उच्च न्यायालयाच्या गोंय खंडपिठांत आव्हान दिवपाचे तयारेंत आशिल्ल्याची खबर आसा.
पुलीस खात्यांतल्या ज्युनिअर श्रेणी अधिकारी (उपअधिक्षक) पदांचे भरती विशींचो घोळ आसा तसोच आशिल्ल्यान ताचेर तोडगो काडपा खातीर सरकारान आयआरबी आनी गोय पुलीस खात्यांतली सिनियर पदां एकठांय करून गोंय पुलीस सेवा नेम 2022 अधिसूचीत केल्यात. सेवा ज्येश्ठते प्रमाण बटडी दिवपा खातीर सेवा ज्येश्ठता वळेरी तयार केल्या. मात तिचे वयल्यान वाद उप्रासपाची चिन्हां दिसपाक लागल्यांत.
गोंय पुलीस खात्यांत 2002 वर्सा 30 जाणांची पुलीस उपनिरीक्षक म्हणून भरती केल्ली. ते उपरांत हे भरतीक मुंबय उच्च न्यायालयाच्या गोंय खंडपिठांत आव्हान दिल्लें. खंडपिठान ही भरती रद्द केल्ली. संबंदीत उपनिरीक्षकांनी खंडपिठाच्या आदेशाक सर्वोच्च न्यायालयांत आव्हान दिल्या उपरांत ताचे वटेन निकाल लागल्लो. मात पुलीस खात्यान ह्या उपनिरीक्षकांक हंगामी तत्वाचेर पुलीस निरीक्षक म्हणून बडटी दिल्ली.
न्यायालयाच्या निकाला उपरांत 2019 वर्सा उपनिरीक्षकांक नियमीत निरीक्षक म्हणून बडटी दिल्ली. हाकाय संबंदीत अधिकाऱ्यांनी आव्हान दिल्या उपरांत सप्टेंबर 2022 वर्सा 53 नंबरा उपरांत आयआरबीच्या 14 अधिकाऱ्यांचो सेवा ज्येश्ठता वळेरेंत आसपाव करून ज्येश्ठता वळेरी जारी केल्ली. मात उपरांत ती रद्द केल्ली. आयआरबींत 2006 वर्सा 22 पुलीस उपनिरीक्षकांची भरती केल्ली. उपरांत तातूंतल्या 14 जाणांक 2019 वर्सा नियमीत निरीक्षक म्हणून बडटी दिल्ली. ताका आव्हान दितगीर ताकां 12 ऑक्टोबर 2016 वर्सा सावन नियमीत निरीक्षक थारायल्लें.
मजगतीं, प्रभारी उपअधिक्षक म्हणून बडटी दिल्ल्या पुलीस निरीक्षकांच्या 28 नंबरा उपरांत आयआरबीच्या 14 पुलीस निरीक्षकांचो आसपाव करून निमणी सेवा ज्येश्ठता वेळेरी जारी केल्या. ताका खंडपिठान आव्हान दिवपाची तयारी संबंदितांनी चलयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
