पुलीस निरिक्षकांच्या बदली प्रकरणाची जातली चवकशी

भांगरभूंय | प्रतिनिधी

पीआय विक्रम नायक हांची कोलवें सावन बदली करपाची मागणी

पणजी: पुलीस निरिक्षक विक्रम नायक आनी विजयकुमार चोडणकार हे पयली आशिल्ले तेच सुवातेर पुलीस निरिक्षक म्हूण सेवेंत आयल्यात. तांच्या बदली प्रकरणाची चवकशी जातली अशें मुख्यमंत्री डॉ. प्रमोद सावंत हांणी सांगलें. पुलीस निरिक्षक विक्रम नायक हांची कोलवें सावन बदली करची अशी ग्रामस्थांनी मागणी केल्या.

कोलवें पुलीस स्टेशनाचे पुलीस निरिक्षक विक्रम नायक हांची लोकांचे मागणे उपरांत बदली जाल्ली. तशेंच जमीन रुपांतरण प्रस्तावा आड जाल्ल्या आंदोलना वेळार पणजीचे पुलीस निरिक्षक विजयकुमार चोडणकार हांची पणजे सावन बदली जाल्ली. आतां हे दोगूय जाण पयली आशिल्ले तेच सुवातेर सेवेत आयल्यात.

विक्रम नायक हांची बदली वाळपय जाल्ली. तरी लेगीत तो परतून कोलवें पुलीस स्टेशनार सेवेंत आयला. तांची बदली करची, अशी मागणी कोलवेंच्या ग्रामस्थांनी मुख्यमंत्री डॉ. प्रमोद सावंत हांचे कडेन केली. ह्या वेळार बाणावलीचे आमदार वेंझी व्हिएगश हाजीर आशिल्ले. कोलव्यां एका मेगा प्रकल्पाक लोक विरोध करताले. पंचायतीन लेगीत प्रकल्पाक परवानो दिवंक नाशिल्लो. तरी लेगीत पुलीस निरिक्षक विक्रम नायक हांणी आंदोलन करपी ग्रामस्थांचें म्हणणें आयकून घेतले ना. हाका लागून तांचे बदलेची मागणी जाल्ली. तांचे बदलेचो आदेश जारी जाल्लो. तरी लेगीत विक्रम नायक परतून कोलवें पुलीस स्टेशनार आयल्यात.

पुलीस निरिक्षक विजयकुमार चोडणकार हांची लेगीत पणजे सावन बदली जाल्ली. बदली जावन लेगीत ते परतून पणजी पुलीस स्टेशनार आयल्यात. तांची बदली करून कारवाय करची, अशी मागणी आमदार विरेश बोरकार हांणी केल्या.

आमदार विरेश बोरकार हांच्या फुडारपणा खाला नगर नियोजन कार्यालयांत शिरदोण ग्रामस्थांचे आंदोलन सुरू आशिल्लें. आंदोलकांनी नगर नियोजन खात्याच्या कार्यालयांत बसकण मारली. दुसरे दिसा आमदार विरेश बोरकार तशेंच आंदोलकाक पुलिसांनी ओडून भायर काडले. पुलीस निरिक्षक विजयकुमार चोडणकार हांच्या फुडारपणा खाला ही कारवाय जाली. हाका लागून विजयकुमार चोडणकार हांची बदली जाल्ली. आतां परतूत ते पणजी पुलीस स्टेशनार आयल्यात. बदलीचो आदेश जारी जावन लेगीत पुलीस निरिक्षक परतून पणजे कसो आयलो? बदली आदेशाची कार्यवाही जावपा सयत ताचेर कारवाय जावपाक जाय, अशी मागणी आमदार विरेश बोरकार हांणी केल्या.