भांगरभूंय | प्रतिनिधी
हेर अधिकाऱ्यांचेर पडटा कामाचो भार
पणजी: गोंयांत कायदो, सुवेवस्था तशेंच गुन्यांवगारी प्रकरणाच्या तपासांत मात्शी लेगीत आडनदर जायत जायत जाल्यार ताचें खापर पुलीस अधिकाऱ्यांच्या वा कर्मचाऱ्यांचे तकलेर फोडून तांकां जापसालदार धरतात. गोंय पुलीस खात्यांतले 56 म्हणल्यार 58 टक्के वरिश्ठ पदां व्हड प्रमाणांत रितीं आशिल्ल्यान कामाचो भार हेर अधिकाऱ्यांचेर पडटा.
सरकारान ‘गोंय पुलीस सेवा नेमावळ 2025’ दुरुस्ती लागू केल्या. ते प्रमाण पुलीस खात्यांत 28 वरिश्ठ श्रेणी (अधिक्षक) आनी 68 कनिश्ठ श्रेणी (उपअधिक्षक) मेळून 96 मंजूर केल्यात. तशेंच प्रतिनियुक्ती, सुटी, प्रशिक्षण राखीव मेळून 27 मंजूर केल्यात. ताका लागून पुलीस खात्यांत वयल्या दोनूय पदां सयत वट्ट 123 पदां निर्माण जाल्यात. कॅडर सोडून आनीक चार पदांक मंजुरी दिल्या.
ताका लागून नियमीत पदां 96 पैकीं 28 अधिक्षक पदां जाल्यार 68 उपअधिक्षक पदां मंजूर जाल्यात. जाल्यार उपअधिक्षक पदां पैकीं 40 टक्के म्हणल्यार 28 पदां थेट भरती खातीर राखीव दवरल्यात. हे विशीं अजून गोंय लोकसेवा आयोगान (जीपीएससी) भरती प्रक्रिया सुरू केल्ली ना.
पुलीस खात्यांत सद्याचे स्थितींत 10 पुलीस अधिक्षक कार्यरत आसात. जाल्यार उपअधिक्षक पदां 68 आसून तातूंतलीं 28 पदां थेट भरती खातीर राखीव दवरल्यात. ताका लागून बडटी पद्दतीचीं 40 पदां आसून तातूंतलीं फक्त 30 पदां कार्यरत आसात.
ताका लागून उपअधिक्षकांची 10 पदां बडटी पद्दतीन भरपा खातीर उपलब्ध आसात. दोनूय पदां पळयत जाल्यार सद्याचे स्थितींत अधिक्षक 10 जाल्यार उपअधिक्षक 30 जाण मेळून 40 अधिकारी कार्यरत आसात. ते खातीर मंजूर जाल्ल्या 96 पदां पैकीं 56 म्हणल्यार 58 टक्के वरिश्ठ अधिकाऱ्यांचीं पदां रितीं आसात.
मजगतीं, उपअधिक्षक पदाचो भरतीच्या घोळा विशीं गोंय स्थीत मुंबय उच्च न्यायालयांत सुरू आशिल्लो खटलो न्यायालयान निकालांत काडला. त्या वेळार न्यायालयान उपअधिक्षक पदां भरती खातीर निरिक्षकांची 2013 पसून ज्येश्ठता वळेरी तयार करपाचो निकाल जारी केला.
पुलीस खात्यांतलीं वरिश्ठ पदां व्हड प्रमाणांत रितीं आशिल्ल्यान ताचो भार हेर अधिकाऱ्याचेर पडत आसा. ताका लागून सेवा प्रक्रियेंत पुलीस कर्मचाऱ्यांचेर जायत आशिल्लो अन्याय पयस करचो. तशेंच रितीं पदां बेगीन भरपा खातीर सरकारान सकारात्मक पावलां उबारचीं. हे खातीर कांय अधिकारी कार्यरत आशिल्ल्याचें मुखार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
