भांगरभूंय | प्रतिनिधी
विजय, अमीत पालेकारां कडल्यान स्पश्ट
सरकारी नोकऱ्यो दिवपाचें हांयस दाखोवन गोंयकारांची कोट्यांनी रुपयांची फटवणूक केल्ल्याच्या प्रकरणांत पुलिसांनी पारदर्शकपणान तपास करचो अशी मागणी इंडिया आघाडीच्या फुडाऱ्यांनी आयतारा पणजेंत घेतिल्ले पत्रकार परिशदेंत केली. अशा प्रकरणांत पुलीस आपल्या घरा लेगीत पाविल्ल्याचें तांणी नमूद केलें.
गोवा फॉरवर्डाचे अध्यक्ष तशेंच आमदार विजय सरदेसाय, काँग्रेसीचे आमदार अॅड. कार्लुस फेरेरा आनी आम आदमी पक्षाचे (आप) राज्य निमंत्रक अमीत पालेकार ह्या वेळार हाजीर आशिल्ले.
सरकारी नोकऱ्यो दिवपाच्या हांयसान लोकांक फटोवपाक खूबशो टोळयो कार्यरत आशिल्ल्याचें मुखार आयलां. अशा प्रकरणांक लागून सरकारी नोकरे खातीर पात्र आशिल्ल्या खूबशा जाणांचेर अन्याय जाला. ताका लागून पुलिसांनी पारदर्शकपणान तपास करून अशा प्रकरणांत वांटेकार आशिल्ल्यांचो सोद घेवचो आनी तांचेर कारवाय करची अशी मागणी विजय सरदेसाय हांणी केली. अशाच प्रकरणांत पुलिसांनी आपल्या फार्महावसांत वचून चवकशी केल्ल्याचें तांणी नमूद केलें.
मजगतीं, पुलिसांनी अशा प्रकरणांत आपल्याकूय लक्ष्य केल्ल्याचें अमीत पालेकार हांणी म्हणलें. सरकारी नोकरीचें हांयस दाखोवन लोकांक लुटिल्ल्याची प्रकरणाची न्यायालयीन चवकशी जावप गरजेची आसा. तशें जायत जाल्यार अशा प्रकरणांचो पारदर्शकपणान तपास जावन हातूंत गुथिल्ले मुखार येतले अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
