भांगरभूंय | प्रतिनिधी
मंगळसुत्र चोरी प्रकरणांत अटक
भांगरभूंय । प्रतिनिधी
पेडणें : तोरसे- पेडण्यां एके बायलेच्या गळ्यांतलें मंगळसुत्र कोंचून घेवन पळून गेल्ल्या आयआरबी दळांतलो निलंबीत पुलीस कॉन्स्टेबल पेठेचोवाडो कोरगांवच्या निकेश च्यारी हाका मोपा पुलिसांनी अटक केल्या. ही घडणूक बिरेस्तारा 17 जुलयाक सकाळीं तोरश्यां घडिल्ली.
मोपा पुलिसां कडल्यान मेळिल्ले म्हायती प्रमाण तोरसेची वासंती रामा शेट्ये रस्त्या वयल्यान वताली तेन्ना दुबावीत निकेश च्यारी हाणें तिच्या गळ्यांतलें मंगळसुत्र कोंचून काडून मोटरसायकली वयल्यान पळ काडलो. ह्या वेळार बायलेन आरड मारिल्ल्यान कुशिकूच आशिल्ले दोग तरणाटे ते बायलेचे मजती खातीर धांवले. तांणी आपले गाडयेंतल्यान दुबाविताचो फाटलाव केलो. दुबावीत फुडें आशिल्लो. ताणें थेट तांबोशे वाठारांत रानांतले दिशेन पळ काडलो. मात फुडें रस्तो नाशिल्ल्यान ताणें गाडी थंय उडोवन तो रानाचे दिशेन पळ्ळो. ह्या वेळार दोनूय तरणाट्यांनी मोपा पुलिशेक हाची म्हायती दिली. मोपा पुलिसांनी दुबाविताचो सोद घेवन ताका ताब्यांत घेतलो. ताका अटक करून ताचे आड गुन्यांव नोंद केलो.
दुबावीत कॉन्स्टेबलान हाचे आदींय अशींच कामां केल्यांत. निकेश च्यारी हाका पोरूं कोरगांव सावन एका ल्हान भुरग्याचें अपहरण केल्ल्या प्रकरणांत अटक केल्ली. आयआरबी पुलीस कॉन्स्टेबल निकेश च्यारी हाचे आदीं निलंबीत जाला. मेळिल्ले म्हायती प्रमाण वासंती रामा शेट्ये ही आपल्या कुळारा आयिल्ली आनी रत्या वयल्यान वतना ही घडणूक घडली. पुलीस निरिक्षक नारायण चिमुलकार हांच्या मार्गदर्शना खाला फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
