भांगरभूंय | प्रतिनिधी
तपासणी खातीर पर्यटकांक आडावपाचे प्रकार बंद करात : लोबो
पणजी, प्रतिनिधी : परवाने तपासपाच्या नांवा खाला पुलिसां कडल्यान पर्यटकांची पिडणूक जाता. हाका लागून राज्यतलें पर्यटन उणें जायत आसा. तपासणे खातीर पर्यटकांक परत-परत आडावपाचे प्रकार बंद करपाची मागणी आमदार मायकल लोबो हांणी पुलीस महासंचालक अलोक कुमार हांचे लागीं केली.
लोबो हांचे सयत डिलायला लोबो आनी केदार नायक हांणी पर्यटकांच्या पिडणुकीच्या प्रस्नाचेर पुलीस महासंचालक अलोक कुमार हांची भेट घेतली.
एखाद्या पर्यटकाचो गुन्यांव दिसपा सारखो (विजीबल ऑफेन्स) नासलो जाल्यार ताका आडावप अयोग्य आसा. पर्यटकांन हेल्मेट घालूंक नासले वा विजीबल ऑफेन्स आसलो जाल्यार ताका आडावन चवकशी जावची. विजीबल ऑफेन्सा बगर एका पर्यटकाक चार खेपो आडावपाक जायना. म्हापशें सावन कळंगुट वचपी पर्यटकांक 6 जाग्यांचेर आडावपाचे प्रकार जाल्या. हेल्मेट आसलें तरी पर्यटकांक परवाने तपासपा खातीर पुलीस 15 मिनटा आडावन दवरतात. पुलिसां कडल्यान अशी पिडणूक जाली, जाल्यार पर्यटक येतले कित्याक? खंयचोच पर्यटक वायट यादीं घेवन परतून वचपाक जाय ना, अशें मायकल लोबो हांणी सांगलें.
हाचे फुंडे पुलिसां कडल्यान पर्यटकांची पिडणूक जावची ना, अशें आस्वासन पोलीस म्हासंचालकांनी दिल्याचे तांणी सांगलें. पर्यटन हो राज्याचो मुखेल वेवसाय आसा. हो वेवसाय तिगोवन दवरपा खातीर पर्यटकांक बरी वागणूक मेळपाक जाय, अशें मायकल लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
