भांगरभूंय | प्रतिनिधी
पणजी : हणजुणच्या एका नायट क्लबांत बावन्सरांनी पर्यटकांक केल्ले मारपेटी उपरांत पुलिसांनी अशीं प्रकरणां गंभीरपणान घेतल्यांत. दर्यादेगांवेल्या पुलिसांनी हॉटेल वेवसायीक, गेस्टहावज धनी आनी संबंधितांची बसका घेवन जागृताय केली. ह्या वेळार पर्यटकां कडेन नमळायेन वागपाचें आनी अतिथी धर्म पाळपाचें म्हत्व सांगलें.
कळंगूट आनी हणजूण पुलिसांनी तांच्या अखत्यारींतल्या हॉटेल, गेस्टहावज आनी हेर निवासस्थानांच्या धनयां वांगडा बसका घेतली. सगलो आढावो घेतलो आनी पर्यटकांचे सुरक्षिततायेचे नदरेन उपाय येजण्यो काडल्यो. कळंगूटे पुलीस स्टेशनांत जाल्ले बसकेक पर्वरेचे उपअधीक्षक विश्वेश कर्पे, पुलीस निरीक्षक परेश नायक हाजीर आशिल्ले. म्हापशें पुलीस स्टेशनांत जाल्ले बसकेक उपअधीक्षक विल्सन डिसोझा आनी पुलीस निरीक्षक सूरज गांवस हाजीर आशिल्ले.
थळावे, पर्यटक आनी आतिथ्य वाठारांतले सुमार १५० धनी आनी वेवस्थापक कळंगूटे बसकेक हाजीर आशिल्ले. हणजूण अधिकार वाठारांतले बसकेक सुमार ७५ जाण वाटेकार जाल्ले.
पुलीस अधिकार्यांनी सर्व सुरक्षा आनी नेम बारीकसाणेन पाळपाची गरज अधोरेखीत केली. विशेश म्हळ्यार पर्यटकांचें रक्षण करपा खातीर आनी पर्यटन हंगामांत भौशीक सुवेवस्था राखपा विशीं म्हायती दिली.
सगली चेक-इन प्रक्रिया योग्य तरेन पाळटले, वैध परवाने राखतले आनी सीसीटीव्ही प्रणाली सदांच कार्यरत उरतली हाची खात्री करपाचे निर्देश आस्थापनांक दिली.
जाय तितले सुरक्षा कर्मचारी तैनात करपाचे आनी गोंय पुलिसांच्या मोबायल ऍप्लिकेशनाचो वापर करून कर्मचार्यांची फाटभूंय तपासपाचे आनी तांच्या वाठारांत ड्रग्ज आनी तंबाखूच्या गैरवापरा पसून जतनाय घेवपाचो सल्लो ह्या वेळार दिलो.
पुलिसांनी संबंधितांक संगीत वाजयतना निर्धारीत आवाजाची मर्यादा आनी वेळ पाळपाची आनी गिरायकांक आकर्शीत करपाक दलाल वा रस्त्यावेल्या रील एजंटांचो वापर टाळचो म्हूण सुचयलें.
सगले पर्यटन आनी आतिथ्य संचालकां कडल्यान पुराय सहकार्याची अपेक्षा करीत, कलंगूट पुलिसांनी आस्थापनांक खंयचीय सुरक्षा वा कायदो आनी सुवेवस्थेच्या समस्यांची बेगोबेग कागाळ करची, अशी सुचवणी केली.
पुराय हंगामांत पर्यटक आनी थळाव्यां खातीर गोंयची प्रतिमा सुरक्षीत, नितळ आनी येवकारपी सुवात म्हणून कायम उरचें हें सुनिश्चीत करपाचो हेत आशिल्ल्याचें पुलीस अधिकार्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
