भांगरभूंय | प्रतिनिधी
भिकेः सोनाली प्रकरण सीबीआय कडेन दिवपाची गरज ना
भांगरभूंय । प्रतिनिधी
म्हापशें: सोनाली फोगट कथीत हत्त्या प्रकरण हें ताच्या भावान लावन धरिल्ल्यान तें पुलीस रोखड्या रोखडे दुबावितां मेरेन पावले, तशेंच गोंय पुलिसांनी विक्रमी वेळांत त्या दुबावितांक अटक केली. आमचे गोंय पुलीस खातें तपास कामांत सक्षम आसा, फक्त राजकी हस्तक्षेप बंद जावपाक जाय, अशें काँग्रेस फुडारी विजय भिके हांणी सांगलें.
फोगट हिच्या सारक्या हायप्रोफायल प्रकरणांक लागून गोंयचें नांव इबाडटा. हाका गृह खातेंच जापसालदार आसा. पुलिसांक अशा प्रकरणांनी तपास करपाक मेकळीक दिनात. वेळावेळार भाजपा फुडारी तशेंच तांचें ल्हान व्हड कार्यकर्ते पुलीस कारवायेंत थेट हस्तक्षेप करतात, असो आरोप भिके हांणी केलो.
म्हापश्यां पक्षाच्या कार्यालयांत घेतिल्ले पत्रकार परिशदेंत भिके उलयताले. ह्या वेळार उत्तर गोंय जिल्हो अध्यक्ष विरेंद्र शिरोडकार, प्रणव फडते आनी हेर मानेस्त हाजीर आशिल्ले.
भाजपा फुडारी सोनाली फोगट हांच्या मरण प्रकरणाचो गोंय पुलिसांनी 24 वरां भितर तपास केलो. ताका लागून आनीक सीबीआय चवकशेची गरज ना, अशें मत भिके हांणी उक्तायलें.
फाटलीं 10 वर्सां राज्यांत भाजपाचें सरकार आसा. ह्या काळांत गोंयांत गुन्यांवकारीचो आलेख वाडला, तशेंच घुंवळे वखदांचो विक्री वेव्हार लेगीत जायत आसा. उत्तर गोंयांतल्या दर्यादेग वाठारांत ह्या काळांत भाजपाचेच आमदार आशिल्ले. ताका लागून ह्या आमदारांच्या काळांतूच घुंवळे वखदांचो वेव्हार अदीक पातळ्ळा, असो आरोप भिके हांणी केलो. सोनाली फोगट भाजपाच्यो फुडारी म्हूण ह्या प्रकरणाचो तपास सीबीआय कडेन दिवपाची गरज ना. एके वटेन गोंयांत लोकांक पियेवपाच्या उदका खातीर वळवळे काडचे पडटात, पूण दुसरे वटेन सध्या गांवगिऱ्या वाठारा सयत सगळे कडेन घुंवळे वखदां सहजतायेन मेळटात, अशी टिका भिके हांणी सरकाराचेर केली.
सिद्धी मरण प्रकरणाचोय तपास जावचोः भिके
सिद्धी नायक मरण प्रकरणाचो तपास अजून लागूंक ना. घडयें हें प्रकरण हायप्रोफायल नाशिल्ल्यान हो तपास आडावला आसतलो. ह्या प्रकरणाचो लेगीत तपास वेवस्थीत जावपाक जाय. आमदार मायकल लोबो सरकारांत आसतना ते घुंवळे वखदां संबंदांत उलयताले. घुंवळे वखदांच्या वेव्हारांत घुस्पल्ल्यांची नांवां आपले कडेन आसात, अशेंय ते सांगताले. आदीं भाजपांत आशिल्ल्यान घडये तांकां उलोवपाक मेळनाशिल्लें. पूण आयज ते काँग्रेसीचे आमदार आसात. तांणी मुखार येवन हीं नांवां जाहीर करची, अशी मागणी विजय भिके हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
