पुला वयल्यान राजकारण !!

भांगरभूंय | प्रतिनिधी

मोरबी पुला सवे जालें तो फक्त एक अपघात, दुर्घटना काय कोणाची घाळपणा, भ्रश्टाचार, गैरकारभार ताचेर उजवाड पडचो आनी दोशींक ख्यास्त जावची. हीच मरण आयिल्ल्यांक खरीं आर्गां थारतलीं.

गुजरातांतल्या मोरबींतले मच्छु न्हंये वयलो झुलतो पूल कोसळ्ळो ताका तीन दीस जाले, तरी आजूनय ताचो आवाज आनी लोकांच्यो किळच्यो हवेंत विरुन वचूंक नात. हो पूल प्रधानमंत्री आनी गृहमंत्र्याच्या राज्यांतलो. साहजिकूच ताचेर आरत्यो परत्यो प्रतिक्रिया येत रावतल्यो, राजकारणूय जातलें. प्रधानमंत्री मोदी हांणी काल घडणूक थळाचेर वचून पळोवणी केली. हे दुर्घटनेंत 135 लोकांक मरण आयलां. 14 जाण हाॅस्पिटलांत आसात, तर दोग बेपत्ता आसात. मरप्यां मदीं 47 भुरगीं आसात. 26 वेर गुजराती नव्या वर्सा निमतान पूल पर्यटकां खातीर उक्तो केल्लो आनी चार दिसांनी ही भिरांकूळ घडणूक घडली.
पूल पडून लोक मेल्यात. वायट प्रसंग. पूण ताचें धंगण राजकी पक्षांच्या समर्थकांक, विरोधकांक आनी फुडाऱ्यांकूय ना. ते टिका, सारवासारव करीत आसात. विज्ञान, तंत्रज्ञानाची देणगी आशिल्ल्या व्हिडियोंनी तांकां लजेक घाल्यात. पूण नाकशिमऱ्यांक खंयची लज? कोण तीन वर्सां पयलींचो पुलाचो व्हिडियो आयचो म्हूण सांगता, तर थोड्यांनी पत्रकार, फुडाऱ्यांचें आदले आनी आतांचें व्हिडियो व्हायरल केल्यात. कोलकातांत पडिल्ल्या उड्डाण पुला संबंदी 7 एप्रील 2016 दिसा प्रधानमंत्री मोदी हांणी जाहीर सभेंत म्हणिल्ले, ‘बांदकाम कंपनी म्हणटा ही देवाची करणी, पूण ती भ्रश्टाचाराची करणी’. आतां तांणी गुजराताचे बाबतींतूय हेंच म्हणचें असो विरोधकांचो आग्रो. एक पत्रकार अस्तंत बंगालाच्या सरकाराक तेन्ना दोश दितना दिसता, पूण आतांच्या व्हिडियोंत तो लोकांचो हातूंत कांयच दोश ना, असो प्रस्न करता. कार्यावळीच्या शेवटाक ताणें गुजरात सरकाराक दोश दिला खंय, अशें कांय जाण सांगतात. एकल्यान, लोक पूल हालयताले. ताका लागून तो पडला आसतलो, हो गुजरात सरकाराक बदनाम करपाक कोणे तरी केल्लो कट, असो जांवय सोद म्हणटात तो लायला. विरोधी पक्षाच्या वावुरप्यांनी वचून तो पूल उडयलो, अशें बी ताका म्हणपाचें ना मूं? 135 लोक मेल्यात. कांय कुटुंबांतलीं भुरगीं, तांचे बापूय, आवयो गेल्यात…. प्रतिक्रिया उक्तायतना लोकांनी मात तरी संवेदनशीलताय दाखोवपाची. रोखडीच गुजरातांत विधानसभा वेंचणूक जावपाची आसा, म्हणटकच प्रचारसभांनी मोरबी पुलाचो चोथो जाय मेरेन सगले वापर करतले.
हो पूल 140 वर्सां पयलींचो. तो तुटपाक पाविल्ल्यान कोट्यांनी रुपया मोडून ताची सात म्हयने दुरुस्ती चलिल्ली. पालिकेन काॅण्ट्रॅक्ट दिल्लो ओरेवा कंपनीक. ती अजंठा घडयाळां खातीर फामाद आसा. गोंयांत कला अकादमीच्या नूतनीकरणा वेळार निविदा मागोवंक ना. तसोच प्रकार मोरबींतूय जाला खंय. लोक घरां बांदतात, तेन्ना तीं पन्नास वर्सां तरी तिगतात. तेर्रास गळटा तितलोच. मात, सरकारी प्रकल्पांच्यो पांच वर्सां भितर भोयो भोयो जातात. कारण बांदकामा वेळार जाल्लो गैरकारभार. मोरबी पुलाचेय कांय केबल काॅण्ट्रॅक्टरान बदलूंक नाशिल्ले अशें उक्ताडार आयलां. म्हणल्यार रस्त्यार फोंड पडलो काय डांबराचीं कपयाळीं दसयतात, तसोच कांयसो प्रकार पुला बाबतींत जाला आसूं येता. मोरबी पालिकेचें तंदुरुस्तीचें प्रमाणपत्र मेळचे पयलींच पूल पर्यटकां खातीर उक्तो केलो. हें कोण सांगता, तर खुद्द पालिकाच. पूल वापरपाक योग्य आसा काय ना तें आमकां तपासपाक मेळ्ळें ना, अशें सांगून तांणी आप- पाप ओरेवा कंपनीच्या माथ्यार थापलां. अशीं एकामेकां कडेन बोटां दाखोवन हें प्रकरण ल्हवूच न्हंयेंत बुडोवपाक मेळचें ना. जीव वगडायिल्ल्या लोकांक न्याय मेळपाक जाय. कांय वेवस्थापक, तिकेट कलेक्टरांक अटक जाल्या. आतां दुर्घटनेची न्यायालयीन चवकशी जावची, अशी याचिका सर्वोच्च न्यायालयांत दाखल जाल्या. पूल पडला तर खरो, म्हणटकच ताका कोण तरी जापसालदार आसतलोच. कोलकात्या सारकी ही कंपनीय देवाक मदीं घेना जाल्यार पुरो. तसो देवूय आतां थोड्यांक सवाय पडला. कोणूय उठ्ठा आनी ताचें नांव घेवन आपलें सादोवन घेता!!
पुलाचेर आशिल्ल्या कांय लोकांनीय स्वताचे उमेदीक आवर घालपाक जाय आशिल्लो. पूल कोसळटनाच्या व्हिडियोंत एकलो तो हालयतना दिसता. तीन वर्सां पयलींच्या व्हिडियोंतूय लोकांचो भिराकूंळ उन्माद दिसता. पुलाचेर, माचयेर, धांपिल्ले बांयचेर, अर्दकुटें बांदकाम जाल्ल्या इमारतीच्या टॅरेसाचेर, न्हंयेचे धडेर…. कितल्या लोकांनी उबे रावपाचें हाका कितें धरबंद आसा काय ना? प्रचार सभा, धर्मीक- संस्कृतीक सुवाळे, मिरवणुको, सैमिक आपत्ती जांणी पळयल्यात तांच्या दोळ्यां मुखार नेमकें चित्र येतलें. ह्या अतिउत्साहाक लागून आमच्या शेंकड्यांनी भावा- भयणींचो जीव गेला.
मोरबी पुला सवे जालें तो फक्त एक अपघात, दुर्घटना काय कोणाची घाळपणा, भ्रश्टाचार, गैरकारभार ताचेर उजवाड पडचो आनी दोशींक ख्यास्त जावची. हीच मरण आयिल्ल्यांक खरीं आर्गां थारतलीं.