भांगरभूंय | प्रतिनिधी
पणजी : राज्यांत फुडाराक उड्डाण पुलाचें वा हेर पुलांचें काम सुरू करचे पयलीं प्रवाशां खातीर योग्य सर्व्हिस रोड तयार करचे असो आदेश बांदकाम मंत्री दिगंबर कामत हांणी कंत्राटदारांक दिलो. गोंयच्या रस्त्यांची गुणवत्ता बरी दवरपाचेर आपूण भर दितलों अशेंय तांणी स्पश्ट केलें.
वालेस जंक्शन लागसारच्या फोंडकुलांनी भरिल्ल्या रस्त्यांची पळोवणी करपा खातीर येरादारी मंत्री माविन गुदिन्हो आनी हेर अधिकार्यां वांगडा केल्ल्या जोड पळोवणे मजगतीं कामत हांणी हे निर्देश दिले. ह्या रस्त्याचे वायट अवस्थेक लागून नागरीक आनी वाहनचालकांक बर्याच त्रासांक तोंड दिवचें पडटा. तशेंच, उड्डाणपुलाच्या कामाक लागून हालींच जाल्ल्या अपघातांत दोग तरणाट्यांचो जीव गेल्ल्यान परिस्थिती चड गंभीर जाल्ली.
३० सप्टेंबरपर्यंत हॉट मिक्सींग
लोकांची गैर वेवस्था परस करपा खातीर बेगोबेग उपाय काडल्यात. मंत्री माविन गुदिन्हो हांचे मागणेक लागून हांव हांगा आयलां. पळोवणी उपरांत आमी दोनूय वटेन रस्ते ३० सप्टेंबर मेरेन हॉटमिक्स करपाचें निश्चीत केलां. संबंदीत अधिकार्यांनी म्हाका आस्वास दिलां, जर पावस नेटान येवंक ना जाल्यार २० सप्टेंबर मेरेन हॉटमिक्स प्लांट सुरू करून दोन दिसांनी काम पुराय करतले, अशें कामत हांणी पत्रकारां कडेन उलयतना सांगलें.
सर्व्हिस रोडा बगर काम ना
प्रवाशांचे वेवस्थे बगर खंयच्याच प्रकल्पाक सरकार परवानगी दिवचें ना. हांवें बांधकाम विभागाच्या मुखेल अभियंत्यांक सुचवण्यो दिल्यात, राज्यांत खंयूय उड्डाणपुलाचें वा पुलाचें काम सुरू करचे पयलीं योग्य सर्व्हिस रोड तयार करपाक जाय. म्हाका वाहनचालक आनी प्रवाशां कडल्यान हाचे मुखार कसलेच तरेची कागाळ नाका. लोक सरकाराक दोश दितात आनी तें चुकीचें न्हय. कारण तांकां बरेच त्रास जातात, अशें कामत हांणी मुखार म्हणलें.
ह्या नव्या सर्व्हिस रोडा खातीर थळावे पंचायत वांगडी आनी नागरिकां कडेन चर्चा करपाचे निर्देशूय तांणी दिले. हे रस्ते दुचाकी आनी चारचाकी वाहनां खातीर आसतले, जड वाहनां खातीर न्हय. तशेंच फुडले धा दीस गरजेचे आशिल्ले सगले दिका दाखोवपी तक्टे (सायनबोर्ड) लावपाकूय तांणी सांगलें. येरादारी उपअधीक्षकांनी पळोवणी करून अहवाल दिले उपरांतूच फुडलीं कामां सुरू करतले, अशेंय तांणी स्पश्ट केलें.
माविन गुदिन्हो हांणी हे कार्यवाहीक येवकार दिलो. बॅरिकेड्सचेर निऑन आनी रिफ्लेक्टिव्ह लाईट्स योग्य तरेन दिसपाक जाय आनी वाठारांत योग्य उजेडाची वेवस्था आसप गरजेचें, अशें तांणी सांगलें. कामत हांणी दिल्ले स्पश्ट सुचोवणेक लागून, ३० सप्टेंबर मेरेन बरे परिणाम दिसतले, असो विस्वास तांणी उक्तायलो. तांणी हालींच जाल्ल्या मरणांचो उल्लेख करून योग्य बॅरिकेड्स लावपाचीय मागणी केली.
काम पुराय जालें काय ना हें तपासपा खातीर परत एक फावट भेट दितले. बरे गुळगुळीत रस्त्यांची निर्मिती, भौशीक सुरक्षा आनी प्रवाशांची बरी वेवस्था ही आपली सर्वोच्च प्राथमिकता आशिल्ल्याचेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
