भांगरभूंय | प्रतिनिधी
कोलझरच्या तरणाट्यांनी पेटयिल्ली वात कोंकणांत उजवाड घालतली काय?
पणजी : आयचो काळ विक्रेचो. जमनींचो, मुल्यांचो आनी नात्यांचोय. अश्या काळांत कोंकणांतल्या कोलझर गांवांतल्या तरणाट्यांनी घेतिल्ली भुमिका फकत एका गांवा पुरती मर्यादीत ना. ती पुराय कोंकणाच्या फुडारा खातीर दिका दाखोवपी थारतली. जमीन विक्री ना, संस्कृती विक्री ना हो मौन संदेश तांणी कृतींतल्यान दिला.
कोलझर ग्रामस्थांनी एकठांय येवन ग्रामदैवत देवी श्रीमाऊली मुखार नाल्ल दवरून एक इतिहासीक आनी भावनीक मागणें केलें. पुर्वजांनी सांबाळून दवरिल्ली गांवची जमीन रक्ताच्या नात्या भायर केन्नाच विकचे नात, असो सामुहीक सोपूत ह्या वेळार तांणी घेतलो. ही फकत जमीन विकची न्हय म्हूण घोशणा नाशिल्ली, जाल्यार पर्यावरण, जैवविविधता आनी गांवच्या आत्म्याची राखण करपाचो संकल्प आशिल्लो.
कोकणांतली जमीन ही फकत मालमत्ता न्हय, ती हांगचे जिणे पद्धतीची श्वासवाहिनी. नाल्ल, सुपारी, भातशेती, आंबे- काजूचीं रानां, पावसाचें उदक धरून दवरपी माती आनी ताचेर निंबून आशिल्ली कृषी वेवस्था, हें सगलें एकामेकां कडेन घट्ट गुंथिल्लें आसा. जमीन विक्रेची वाडपी मागणेचेर हें घालो घालपा सारकें आसा, हाची जाणीव कोलझच्या ग्रामस्थांनी दाखोवन दिली.
हे प्रतिज्ञेंतल्यान ग्रामस्थांनी आनीक एक ठाम भुमिका स्पश्ट केल्या. ‘गावहिताविरोधी गजालींक प्रत्यक्ष, अप्रत्यक्ष फाटबळ दिवप्यांक केन्नाच साथ दिवचे नात’ हें विधान राजकी, अर्थीक आनी समाजीक पांवड्यार खूब म्हत्वाचें. कारण गांवचो फुडार हें सध्याच्या फायद्यांचेर न्हय, दीर्घकाळच्या मुल्यांचेर थारता, हें तांणी सांगलें.
म्हत्वाची गजाल म्हणल्यार हे चळवळीचें फुडारपण गांवांतल्या तरणाट्यांनी केलें. शारां कडेन स्थलांतर, नोकरी-धंद्याच्या सोदांत गांव रिकामी जातना, कोलझरांतल्या तरणाट्यांनी मात आपल्या मुळां कडेन घट्ट नातें बांदलां हें तांणी दाखोवन दिलां, आधुनिकताय स्वीकारतना परंपरा सोडचीच पडटा, अशें कांयच नासता. आयज कोलझरकारांनी पेटयिल्ले हे वातींतल्यान पुराय कोंकणांत उजवाड पडटलो काय? हो प्रस्न चर्चेचो विशय थारतलो.
जमीन विक्रेक विरोध, थळाव्या पर्यावरणाचें संरक्षण आनी ग्रामसंस्कृतीची जतनाय ह्या तीन मुद्यां भोंवतणी कोंकणांत एक नवी चळवळ उबी रावपाचीं चिन्नां दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
