भांगरभूंय | प्रतिनिधी
वेंचणूक जावं वा हेर कार्यावळी आमच्या देशांत पोस्टरांचो उणाव ना. आयोजक संदूच सोदतात, पोस्टर लावपाची. 30-40 वर्सां पयलीं वेंचणूक लागीं पावली काय झाडांचेर बॅनर हुमकळयताले, मेळटा थंय कागदी पोस्टर लायताले. रस्त्यांचेर घोशणां, चित्रां पितारताले…. मात आतां बदलत्या तंत्रज्ञानाक लागून हें काम चडूच सोंपें जालां. संगणकाचेर मजकूर, चित्रां, फोटो घालून पोस्टर तयार करपाचो आनी ताच्यो जाय तितल्यो प्रती छापून घेवपाच्यो. मागीर जागो मेळटा थंय ताचें प्रदर्शन करपाचें. वेंचणूक वा कार्यावळ सोंपली म्हणटकच ते पोस्टर, बॅनर यादीन काडपाक जाय. पूण तें जायना. वर्साचीं वर्सां ते थंयच हुमकळटात, फडफडटात, लोंबतात, धोलतात….!! पोरूं 14 फेब्रुवारीक विधानसभा वेंचणूक जाल्ली. तेन्ना सगले कडेन पोस्टरांचीं ल्हारांच आयिल्लीं. तातूंतल्या कांय ल्हारांचो खळखळ अजून गाजता. आम आदमी पक्ष आनी तृणमूल काँग्रेसीन लायिल्ल्या वेंचणूक पोस्टरां आड पेडणें पुलिसांनी कागाळ केल्या. गोंय मालमत्ता विद्रुपीकरण प्रतिबंद कायद्या खाला ही कारवाय जाल्या. पांच पुलीस स्टेशनांनी 13 गुन्यांव नोंद आसात. (हाचे फाटल्यान राजकी कारण आसा काय गोंय नितळ, सोबीत उरचें ही भावना आसा?) भितरले 12 आम आदमी पक्षा आड. दिल्लीचे मुख्यमंत्री आनी आम आदमी पक्षाचे मुखेली अरविंद केजरीवाल हांकां हे विशींचे चवकशेक 27 एप्रीलाक हजर रावपाची नोटीस पुलिसांनी धाडिल्ली. मात आतां ती रद्द करपाक केजरीवाल न्यायालयांत गेल्यात.
देशांतल्या सगल्याच राज्यांनी खास करून रस्त्यांचे देगेक पोस्टर, व्हडले होर्डिंग लावपाची पद्दत आसा. ह्या व्हडल्या तक्ट्या, फलकां आड कांय जागृत नागरीक अदीमदीं आवाज काडीत आसतात. कारण अपघात. हीं व्हडलीं होर्डिंगां आकर्शक आसली काय वाहन चलोवप्यांची थंय नदर वता आनी लक्ष विचलीत जाल्ल्यान अपघात घडटात. होर्डिंगांक लागून येरादारी विशींचे सुचोवणी फलक लिपतात. हे चडशे फलक उत्पादनाच्या जायरातींचे आसतात. तातूंत राजकी फलकूय आसतात. ‘गोणीची सकाळ’ हें व्हडलें होर्डिंग वाचकांक याद आसतलेंच. आदल्या तेंपार टीव्हीचो व्हडलोसो प्रसार जावंक नाशिल्लो. सोशल मिडियाय नाशिल्ली. त्या काळांत लोकांक उत्पादनाची वळख जावची, कार्यावळीची म्हायती मेळची म्हूण पोस्टर, होर्डिंग, बॅनर लायताले. मात आतां तांची खरेंच गरज आसा? आयज संगणकाचेर तरातरांचे पोस्टर करपाक मेळटात. जाय तितल्या लोकांक सोशल मिडिया वयल्यान ते धपक्याक धाडपाक मेळटात. टीव्हीचेरुय शेंकड्यांनी चॅनल आयल्यात…. तरीय होर्डिंग लावपाची ही परंपरा तिगून आसा.
कायद्यान होर्डिंग लावपाक परवानगी आसा. मात, बेकायदेशीर मार्ग आपणावन पोस्टर लावप सामकें चुकीचें. हातूंत राजकी पक्षूच न्हय, तर ल्हान- व्हड वेपारी, लघुउद्देजक, धंदेकार, साबार कार्यावळींचे आयोजक हांचोय आसपाव आसा. बरें, कार्यावळ सोंपली तरी ते कोण काडिनात. ह्या प्रचार साहित्याक लागून शार, गांव बुरशे, विद्रुप जातात, हें कोणाक कशें कळना? हे पोस्टर स्वराज्य संस्थांचे परवानगे बगर लावपाक जायना. घडये ते लावपी पालिका, पंचायतींक विचारताय आसतले. मागीर ते काडपाची जापसालदारकी कोणाची? लावपी काडिनात जाल्यार पालिका, पंचायतींनी हे बॅनर, पोस्टर काडचे. हे पोस्टर लावपाक सगल्या स्वराज्य संस्थांनी थारावीक शुल्क घेवचें…. अमूक दिसांनी ते काडिनाशिल्ल्यांक दंड दिवचो. जशे पेडणें पुलीस आतां दिवंक सोदतात तसो.
दिल्ली, मुंबयंत पोस्टराच्या माध्यमांतल्यान एकमेकांक थोमणे दिवपाचे, टिका करपाचे प्रकार अक्षरशा दर दोन म्हयन्यांनी घडटात. हालींच दिल्लीं मोदीं हांचे आड 11 भाशांनी पोस्टर लागिल्ले. दक्षीण भारतांतूय हे पोस्टर झूज चलता. ते तयार करप्यांक अर्थीक लाव जाता खरो, पूण समाजमन पिड्ड्यार जाता. मनीस दुखावता. हालींच मुंबय अजित पवार भावी मुख्यमंत्री असो पोस्टर लागिल्लो. राजकी पक्षांक वा हेर कोणाक पोस्टर, बॅनर, हाॅर्डिंग लावपाकूच जाय जाल्यार ताणें तें कायदेशीर मार्गान लावचें. सरकारी बशींचेर सरकारी जायराती आसतात, तश्यो प्रचाराच्यो जायराती राजकी पक्षांनीय करच्यो. वेंचणुकांच्या दिसांनी रातभर भोंवून पक्ष वावुरपी सरकारी मालमत्तांचेर, भौशीक जाग्यांचेर पोस्टर, बॅनर, बावटे लायतात, ताका आळो बसपाक जाय. कारण कायद्यान भौशीक मालमत्ता बुरशी करपाक मेळना. नाजाल्यार, दरेका गांवच्या बाजारांत पोस्टरां खातीर एक थारावीक जागो दिल्यार कशें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
