भांगरभूंय | प्रतिनिधी
कनिश्ठ संशोधकाक 25 जाल्यार वरिश्ठ संशोधकाक 40 हजार
भांगरभूंय । प्रतिनिधी
पणजी : गोंय तशेंच अस्तंत दर्यादेग वाठारांतल्या पुरातत्व मळार संशोधना खातीर शिश्यवृत्ती येवजण जाहीर केल्या. ते प्रमाण कनिश्ठ संशोधकांक म्हयन्याक 25 हजार जाल्यार वरिश्ठ संशोधकाक म्हयन्याक 40 हजार रुपयांची शिश्यवृत्ती दितले. दोनूय गटांत शिश्यवृत्ती दोन वर्सां खातीर दितले. दरेका गटांत चडांत चडदोन व्यक्तींक ही शिश्यवृत्ती दितले. येवजणेचो कालावधी दोन वर्सांचो आसतलो.
पुरातत्व खात्यान जारी केल्ले अधिसुचोवणे प्रमाण, गोंयांतल्या पुरातत्व मळार संशोधन करपाक उर्बा दिवप, गोंयांतल्या पुरातत्व म्हायतीचो डेटाबेस तयार करचे खातीर ही येवजण तयार केल्या. हे वरवीं गोंयांतल्या पुरातत्व मळा वयल्यो अजून मेरेन सोद लागूंक नाशिल्ल्यो गजाली मुखार येतल्यो, अशी आस्त आसा. आयिल्ले म्हायतीचो अभ्यास करून खात्या वतीन ती उजवाडयतले. येवजणेचो लाव घेवपाक कनिश्ठ संशोधकांनी इतिहास, प्राचीन भारतीय इतिहास, संस्कृती आनी पुरातत्व वा इंडोलॉजी विशयांत एमए केल्ली आसपाक जाय. तेचवरी कनिश्ठ संशोधकाची पिराय 35 वर्सां मेरेन आसप गरजेचें आसा. तशेंच वरिश्ठ संशोधका कडेन डॉक्टरेट पदवी आसप गरजेचें आसा. एके व्यक्तीक ही शिश्यवृत्ती एकदांच दितले. शिश्यवृत्ती खातीर निवड जाली जाल्यार ते व्यक्तीक फुडलीं पांच वर्सां खात्याची हेर कसलीच शिश्यवृत्ती मेळची ना. शिश्यवृत्ती खातीर खात्या वतीन जायरात दितले. खात्यांतली भितरली समिती आयिल्ल्या अर्जांची छाननी करून निवड करतली. ते भायर संशोधनाच्या कामाकाजाचो नियाळ घेवचे खातीर पांच वांगड्यांचे समितीची स्थापना करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
