पुरातत्त्व खात्यांतल्या तीन कोटी कागदपत्रांचेर आतां सीसीटिव्ही कॅमेऱ्यांची नदर

भांगरभूंय | प्रतिनिधी

-सुभाष फळदेसायः कार्यालयाचें कदंब पठाराचेर आल्कोन इमारतींत स्थलांतर

भांगरभूंय प्रतिनिधी कागदपत्रांनी फेरफार करपाचे प्रकार घडचे न्हय, हे खातीर पुरातत्व खात्या कडेन सध्याचे स्थितींत आशिल्ल्या सुमार तीन कोटी कागदपत्रांचेर हाचे मुखार सीसीटिव्ही कॅमेऱ्यांची नदर आसतली. तशेंच कागदपत्रांच्या डिजिटलायझेशनाचे प्रक्रियेक नेट दितले, अशी हमी पुरातत्व आनी पुराभिलेख खात्याचे मंत्री सुभाष फळदेसाय हांणी दिली.

पणजी:

पुरातत्व खात्याचे शुक्रारा पणजेंतल्यान कदंब पठारा वयल्या आल्कोन इमारतींत स्थलांतर केला. ह्या वेळार आयोजीत कार्यावळींत ते उलयताले. पुरातत्व खात्या कडेन 500 वर्सां पसुनचीं सुमार तीन कोटी कागदपत्रां आसात. हातूंतल्या कांय कागदपत्रांनी फेरफार जाल्ल्याचे प्रकार कांय वर्सांत मुखार आयल्यात. हाचे मुखार अशें प्रकार घडचे न्हय, हे खातीर नव्या इमारतींत स्थलांतर केल्ल्या कागदपत्रां 24 वरां सीसीटिव्ही कॅमेऱ्यांच्या नियंत्रणा खाला आसतली. तशेंच थंय उजो पालोवपी दळाच्या वाहनाचीय वेवस्था करतले, अशें मंत्री फळदेसाय हांणी म्हणलें.

पुरातत्व खात्या कडल्या इतिहासीक कागदपत्रांचो फुडले पिळगेक व्हड लाव मेळटलो. आयजूय जायते इतिहास अभ्यासक, संशोधक ह्या कागदपत्रांच्या आदारान संशोधन करतात.

पुरातत्व खात्याक आल्तिनो -पणजे स्वतंत्र जागा मेळची, थंय खात्याची स्वताची इमारत उबी जावची, असो प्रस्ताव आपूण सरकाराक सादर केला. ताचेर बेगिनूच विचार जातलो. ह्या कागदपत्रांच्या डिजिटलायझेशनाच्या कामाक नेट दिवन ती ई-स्वरुपांत लोकांक उपलब्ध करून दिवपाचो आपलो विचार अाशिल्ल्याचे मंत्री फळदेसाय हांणी सांगलें.