भांगरभूंय | प्रतिनिधी
डॉ. प्रमोद सावंतः पुनर्वसन मंडळाचे बसकेंत जालो निर्णय
पणजीः गोंय पुनर्वसन मंडळा वतीन ज्या लोकांचें सरकारान पुनर्वसन केलां तांकां घरांच्या जमनीचे मालकी हक्क मेळटले. सडा, वास्को आनी हेर कांय जाग्यांचेर पुनर्वसन मंडळान घरां बांदून दिल्यांत. ह्या सगल्यांक मालकी हक्क मेळटले, अशी म्हायती मुख्यमंत्री डॉ. प्रमोद सावंत हांणी दिली.
येता त्या वर्सा गोंय पुनर्वसन मंडळाक 85 कोटींचें अनुदान मेळटलें. हें अनुदान सदचो खर्च तशेंच नव्या येवजणे खातीर मेळटले, अशी म्हायती मुख्यमंत्री डॉ. प्रमोद सावंत हांणी दिली.
मुख्यमंत्री डॉ. प्रमोद सावंत हांच्या फुडारपणा खाला गोंय पुनर्वसन मंडळाची बसका जाली. बसकेक आमदार राजेश फळदेसाय, मुखेल सचीव डॉ. व्ही. कांडावेलू, उपजिल्होधिकारी आनी सचीव हाजीर आशिल्ले. बसकेंत म्हत्वाच्या प्रस्नांचेर चर्चा जाली.
घातक पालसाणां लागीं आशिल्ल्या घरांचें सरकारान पुनर्वसन मंडळा वतीन पुनर्वसन केलां. तांकां सडा, वास्को वा हेर वाठारांनी घरां बांदून दिल्यांत. घरांचे मालकी हक्क नाशिल्ल्या कारणान तांकां दुरुस्ती तशेंच हेर कामां खातीर आडखळी येतात. जमनीचे मालकी हक्क मेळ्ळे उपरांत ह्यो आडखळी पयस जातल्यो.
हाचें फुडें पुनर्वसन मंडळा वतीन जावपी प्रकल्प सरकारी खासगी भागिदारीच्या (पीपीपी) तत्वाचेर जातले. तीन प्रकल्प बेगीन पुराय करपाचो निर्णय जाला.
पुनर्वसन मंडळाचे काम फुडें व्हरपा खातीर आनीक कर्मचाऱ्यांची गरज आसा. कर्मचाऱ्यांची पदां तयार करपाक बसकेंत मान्यताय दिली. कर्मचाऱ्यांच्या पगारा खातीरचे अनुदान एप्रीलांत एकाच हप्त्यात दितले. ज्या लोकांचें पुनर्वसन जालां तांकां जमनीचे मालकी हक्क दिवपाचो निर्णय बसकेंत जाला. हाचें फुडें पुनर्वसन मंडळाचे सगले प्रकल्प पीपीपी तत्वाचेर जातले. पुनर्वसन मंडळा खातीर कर्मचाऱ्यांचीं पदां तयार जातलीं. तशेंच कर्मचाऱ्यांच्या पगारा खातीर एप्रीलांत एकाच पांवड्यार अनुदानाची रक्कम दितले. हेर अनुदानाची रक्कम दोन हप्त्यानी वितरीत जातली. येता त्या वर्सा खातीर 85 कोटींच्या निधीक मंडळान मान्यताय दिल्या. पुनर्वसन मंडळाचे बसकेंत हे निर्णय जालो. मुख्यमंत्री डॉ. प्रमोद सावंत हांणी ट्वीट करून ह्या निर्णयांची म्हायती दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
