भांगरभूंय | प्रतिनिधी
व्हॅटिकन, खबरां संस्था ः अमेरिकेचे अध्यक्ष डोनाल्ड ट्रम्प हांणी म्हणलें, म्हाका दुबाव आसा रशियाचे अध्यक्ष पुतिन युद्ध सोंपोवपाक सोदतात काय नात. एक दीस आदीं तांणी सांगिल्लें‘ रशिया आनी युक्रेनांत बेगीनूच शांतिकाय करार जावपाक शकता.
पोप फ्रान्सिस हांच्या निमाण्या संस्काराक ट्रम्प शेनवारा रोमाक पावले. हांगा तांणी युक्रेनचे राष्ट्राध्यक्ष झेलेन्स्की हांची भेट घेतली. हाचो एक फोटोय मुखार आयलां. जातूंत थंयच दोन कदेली घालून दोनूय फुडारी उलयतात.
दोन म्हयन्यां आदीं फेब्रुवारींत राष्ट्राध्यक्ष ट्रम्प आनी उपराष्ट्रपती जेडी व्हॅन्स हांचे कडेन जाल्ल्या वादा उपरांत झेलेन्स्की आनी ट्रम्प हांची ही पयलीच भेट आशिल्ली.
पुतिनाक वेगळे तरेन हाताळपाक जाय
पोप फ्रान्सीस हांच्या अंत्यसंस्कारा उपरांत अमेरिकेक परततना ट्रम्प हांणी सोशल मीडिया पोस्टांत म्हणलां, फाटल्या कांय दिसांनी पुतीन हांणी युक्रेनांतले रावपाचे वाठार, शारां आनी गांवांचेर अंदाधुंद क्षेपणास्त्रां सोडल्यांत.
तर ट्रम्प हांची भेट घेतले उपरांत झेलेन्स्की हंणी सोशल मिडियाचेर म्हणलां, ही भेट एकदम बरी जाली आनी तातूंत इतिहासीक कितें तरी जावपाची तांक आसा.
आमचे उद्दीश्ट आमच्या लोकांच्या जीवाची राखण करप आनी पुराय आनी बिनशर्त युद्धबंदी लागू करप आसा. आपल्याक एक घटमूट आनी शांतिकाय निर्माण करपाची आसा, जी परत केन्नाच झूज जावपाक दिवची ना. जें आपूण एकवटान बरे परिणाम मेळयले, जाल्यार ही बसका इतिहासीक थारपाक शकता. राष्ट्राध्यक्ष ट्रम्प हांचे उपकार.
अमेरिकेचे राष्ट्राध्यक्ष डोनाल्ड ट्रम्प हांणी म्हणलां, रशियान किवाचेर केल्ल्या हल्ल्याचेर हां खूश ना. तांणी ट्रुथ सोशलचेर बरयलें, कीवा वयल्या रशियन हल्ल्याक लागून हांव खूश ना. हें गरजेचें नासलें आनी वेळ खर्यानीच वायट आशिल्लें. व्लादिमीर, रावात! दर सप्तकाक ५००० सैनीक मरतात. चलात, शांतता करार करूया. दोन दिसां पयलीं, बुधवारा रातीं, रशियान युक्रेनची राजधानी कीवाचेर क्षेपणास्त्रां आनी ड्रोनान हल्लो केलो. ह्या हल्ल्यांत ८ जाणांक मरण आयलें, ७० परस चड जाण जखमी जाले. फाटल्या ९ म्हयन्यांतल्या युक्रेनच्या राजधानीचेर हो सगल्यांत व्हड हल्लो आशिल्लो.
हल्ल्यांक लागून जायत्या इमारतींक उजो लागिल्ल्याचें अधिकार्यांनी सांगलें. ४२ जाणांक हॉस्पिटलांत दाखल केलें, जातूंत ६ चले आशिल्ले. मिडिया रिपोर्ट्स प्रमाण, रशियान युक्रेनाचेर ७० क्षेपणास्त्रां आनी १४५ ड्रोनान हल्लो केलो, जांचें मुखेल लक्ष्य राजधानी कीव आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
