भांगरभूंय | प्रतिनिधी
नवी दिल्ली, खबरां संस्था ः दिल्लीच्या कडकडडूमा न्यायालयांत 9 वर्सां सावन घोव- बायले मदलो वाद चालू आशिल्लो. दोगांयनी एकामेकां आड जायते गुन्यांव दाखल केल्ले. दोगांय मदले घटस्फोटाचे प्रकरणय निमाण्या पांवड्यार पावल्लें. पूण तांच्या 11 वर्सां पिरायेच्या पुताक लागून घटस्फोटाचो विचार भायरावन एकठांय रावपाचोय निर्णय घेतलो.
चड म्हायती प्रमाण, घोव- बायलाची घटस्फोट प्रकरणांतली निमाणी सुनावणी न्यायालयान नेमिल्ल्या मध्यस्थी केंद्रांत जाली. हे वेळार घोव आनी बायल दोगाय हाजीर आशिल्ली. बायल आपले वांगडा तांच्या 11 वर्साच्या पुताक घेवन गेल्ली. मध्यस्थीन निमाणे एक फावट घोव, बायलेक विचारलें, तुमकां एकठांय रावपाचें आसा? तशें ना जाल्यार तुमची घटस्फोटाची फायल निमाण्या निर्णया खातीर कुटुंबिक न्यायालयात धाडटां. ते वेळार घोव, बायलेन एकठांय रावपाक न्हयकार दिलो. उपरांत तांच्या 11 वर्साच्या पुताक न्यायाधीशान विचारलें तुका कोणा बरोबर रावपाक जाय? ताचेर तांणी म्हणलें, म्हाका म्हज्या आवय-बापाय वांगडा रावपाक जाय. ती दोगाय एकठांय कित्याक रावनात?
न्यायाधीशान सांगलें, तुज्या आवय-बापायचे पटना देखून तांकां एकठांय रावपाचें ना. म्हणून तीं घटस्फोट घेता. ताचेर त्या 11 वर्साच्या चल्यान म्हणले ‘न्यायाधीश काका, म्हाका म्हज्या आवय- बापाय कडल्यान घटस्फोट जाय’. जर ते एकठांय रावूंक शकना जाल्यार म्हाकाय तांच्या पसून घटस्फोट जाय. हांव रावलो तर दोगांय बरोबर ना तर कोणाच बरोबर ना.
पुताच्या ह्या उलोवण्यान आवय- बापायक वायट दिसलें आनी दुख्ख जालें. उपरांत कांय वेळा घोव- बायल वेगवेगळे वचून अर्द वर उलयले. हाचे उपरांत दोगांयनी न्यायालयांत येवन दोगांय जाणां भुरग्या पसून वेगळें रावपाक शकना अशें सांगलें. देखून दोगांयनी एकामेकां आड दाखल केल्ले सगळे खटले फाटीं घेतलें आनी आयज 1 फेब्रुवारी सावन आमी आमचे नातें नव्यान सुरू करून एकठांय रावपाचें थारायलां, अशें न्यायालयांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
