भांगरभूंय | प्रतिनिधी
संवसारांत असले फकत पांच दुयेंती: उपचाराचो खर्च परवडपा भायलो
मडगांव : तिच्या गर्भांत पुताची हालचाल जायनाशिल्ली. मात शस्त्रक्रिया करून त्या बाळकाक आवयच्या हातांत दितांच तांणी आपले आवयचें बोट धरलें. हें सगळें कथे वरीं दिसतलें. ते आवयचें नांव सुझान आनी पुताचें नांव शेनन. फाटल्या १७ वर्सां सावन बरेच कश्ट घेवन पुताक सांबाळपी ते आवयन ताच्या वैजकी उपचारा खातीर लाखांनी खर्च आशिल्ल्यान समाजा कडल्यान मजती खातीर उलो मारला.
भुरग्यां खातीर आवय कितेंय करपाक शकता, हें दाखोवन दिवपी ही काणी माडेल, फातोड्डें रावपी सुझान आनी शेनन ह्या आवय आनी पुताची. रवी फर्नांडीस हे तारवटी आशिल्ल्यान ते स ते आठ म्हयने घरा पसून पयस आसतात. सुझन हिका शॉन आनी शेन अशे दोग पूत आसात. शेनन हो तिचो तिसरो पूत.
शेननाच्या जल्मा पयलींच सुझेनाच्या गुरवारणाच्या काळांत तपासणे वेळार कांय आडखळी दाखयल्यो. वैजकी अधिकार्यांनी पुताच्या काळजाचे ठोके जाणवनाशिल्ल्याचें सांगलें. मात सुझन तें मानपाक तयार नाशिल्ली. उपरांत दोन दीस वाट पळोवन शास्त्रक्रिया करपाचो निर्णय घेतलो. शस्त्रक्रिये उपरांत आपल्या पुताक निमाणो आपल्या हातांत दियात, अशी आवयची मागणी आयकून दोतोरांनी पुताक ताच्या हातांत दिलो. आवयच्या हातांत येताच पुतान आवयचें बोट धरलें. उपरांत शेनन व्हड जायत गेलो. तरीय ताका नेमकें कसलें दुयेंस आसा हें दोतोरांक समजूंक ना. शेननान कश्ट घेवन काम केल्यार रोखडेंच ताचें काळीज बंद पडटा. हाका लागून ताच्या मेंदवा मेरेन पावपी संवेदनांचेरूय परिणाम जायत आसता. गोंयां सयत बंगळुरू आनी परदेशांतल्या वैजकी अधिकार्यांचे मजतीन शेनचे उपचार सध्या सुरू आसात. ताका मल्टीडिसऑर्डर आशिल्ल्यान, ताच्या उपचारा खातीर लाखांनी खर्च फर्नांडीस कुटुंबान केला.
सुझन हांणी सांगलें, शेननाक आशिल्ल्या दुयेंसाचे संवसारांत फकत पांच जाण आसात. देशांत तीन आनी गोंयांत शेनन एकटोच. हाका लागून ताका लागपी वखदां खुबश्या सुवातांवेल्यान सोदून हाडचीं पडटात. स म्हयन्यांच्या वखदांची तरतूद पयलींच करून दवरची पडटा. शेनन हांणी धावेचे परिक्षेंत विशेश श्रेणींत गुणूय मेळयल्यात. तशेंच ताका स्केटींग आनी हेर खेळांचीय आवड आसा.
शेननाची आवय सुझन हांणी सांगलें, वैजकी अधिकार्यांनी मरण आयलें म्हणून घोशीत केल्ल्या शेननाक आतां मेरेन विवीध दुयेंसांतल्यान, शस्त्रक्रियेंतल्यान काळजी घेत व्हड केला. तो जिणे कडेन सकारात्मक तरेन पळयता. आतां मेरेन सरकारा कडल्यान वा हेर संस्थां कडल्यान कसलेच तरेची मजत मेळूंक ना. मात ह्यान फुडें ताचो वैजकी खर्च आनी घराचो खर्च काडपाक कठीण आसा. राज्य सरकार, राज्यपाल वा खंयच्याय ट्रस्टा कडल्यान शेननच्या खर्चा खातीर अर्थीक मजत जावची, अशी अपेक्षा तिणें उक्तायली.
शेननचे जिणेचेर तियात्र, पुस्तकां
शेननाचे जिणेचेर तियात्रूय आयलां. तशेंच ‘द सायलेंट इको’ नांवाचें पुस्तकूय बरयलां. संवसारभर तें धाडलां. आतां ताची ही काणी गोंयकारांक कळपा खातीर रवींद्र भवन, मडगांवां १९ तारखेक सांजेवेळार साडेसात वरांचेर तियात्र सादर जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
