भांगरभूंय | प्रतिनिधी
चिंतन – 53
आमी भुरगेपणांत शाळेंत आसतना शिक्षक आमकां “सद्गुण म्हणल्यार कितें आनी पाप कितें?” असो प्रस्न विचारताले. कांय जाण जाप दितले – देवाची पुजा करप हो सद्गुण, फट उलयल्यार पाप. कांय जाण म्हणटले – देवळांत नाल्ल फोडल्यार तो सद्गुण, आनी चोरल्यार पाप, आनी काॅपी केल्यार पाप. पूण संत तुकाराम महाराजान हो सगळो गोंदळ सोडयलो. ते म्हणटात – “पुण्य परउपकार” म्हणल्यार आमी थोडी मजत, थोडी थाकाय दुसऱ्याच्या जिवितांत दिल्यार तो खरो सद्गुण.
म्हाका याद आसा, आमच्या शेजाराक एक जाण्टी आजी रावताली. भुरगीं परदेशांत, घर रितें आशिल्लें. आजी किराणा म्हाल हाडपाक त्रास जातालो. आमच्या सोसायटींतली एक धा वर्सां पिरायेची चली शाळेंतल्यान येतना दर दिसा आजी खातीर पाव हाडटाली. बदलाक आजी तिचे खातीर थोडी शेंगदाण्याची चटणी दवरताली. पळयात, ती चली घांटी वाजोवंक देवळांत गेली ना, ना ताणें जप केलो. पूण तिच्या ल्हानश्या उपकाराक लागून आजयेचे दिसपट्टे त्रास उणे जाले. हेंच खरें पुण्य न्हय?
व्हडली खूब पुण्य मेळचें म्हूण दानधर्म करपाक लागतात, व्हडल्यो येवजण्या आंखतात. पूण खरें म्हणल्यार पुण्य आमचे दिसपट्टे जिणेंत लिपिल्लें आसता. ऑफिसांत वतना वाटेर ऑटोरिक्शा ड्रायव्हराक उदकाची बाटली दिवप, बशींत थकल्ले बायलेक आमची सुवात दिवप, रस्त्यार पडिल्ल्या अपघात पिडेस्ताक उखलून हॉस्पिटलांत व्हरप — ह्या ल्हान ल्हान कृत्यांचें मोल खंयच्याय भांगराच्या दागिन्या परस मोलादीक आसा.
तुकोबा म्हणटात, दान हें पुण्य, कारण तातूंतल्यान कोणाक लुकसाण जायना, कोणाक कसलेंच त्रास जायनात. उरफाटें सुख, मुमुरखो हांसो आनी दुसऱ्याच्या जिवितांत जगपाची तांक वाडयता. पुण्य म्हणल्यार मळबांक सर्त करपी उपासना न्हय; पुण्य म्हणल्यार मनाक भिडपी कृतज्ञताय.
आयच्या वेगान चलपी संवसारांत आमी इतले व्यस्त आसात की दुसऱ्यांक मजत करपाचो वेळ, इत्सा आनी मन खंय तरी शेणलां. पूण याद दवरात — पुण्य पयसुल्ले यात्रेंत न्हय, तर दिसपट्टे जिणेंतल्या ल्हान ल्हान खिणांनी आसता.
तर फाल्यां सावन कोणाक तरी आधार दिवया, कोणाक हात दिवया. आमी विचार लेगीत करचेनात, पूण कोणाच्या तरी जिवितांत आमी उजवाडाचो किरण थारतले. आनी तुकोबा म्हणटा तशें — तेंच आमच्या जिवितांतलें खरें पुण्य आसतलें.
याद करात. कोणाच्याय ल्हानश्या आदारान तुमचें मन भारावन गेल्ल्याचो एखादो अणभव तुमचे कडेन आसा?
ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
