भांगरभूंय | प्रतिनिधी
पुणे, खबरां संस्था: अमरावतीच्यान कामा खातीर पुण्याक आयिल्ल्या ९ जाणांक वाघोली केसनंद वाठारांत डंपरान चिडि्डले. पुण्याक काम सोदपा खातीर आयिल्ले हे कामगार फुटपाथाचेर न्हिदिल्ले. मात वेगान आयिल्ल्या डंपरान त्या णवूय जाणांक चिड्डीले. हातूंत तिगांक मरण आयलां. जाल्यार ६ जाण गंभीर जखमी आसात. मरण आयिल्ल्यां मदीं एक आनी दोन वर्सांच्या सानुल्यांचो आसपाव आसा. हे घडणुके विशीं खबर मेळटांच पुलिसांनी रोखडीच डंपर चालकाक अटक केली.
प्रत्यक्षदर्शींनी म्हायती दितना सांगलें, जर तो डंपर दुसरे वटेन वळिल्लो जाल्यार आनीक १५- १६ जाणांक मरण येवपाचें. घडणुके सुवातेर आशिल्ल्या लोकांनी बोवाळ करून डंपर दुसरे वटेन घालपाक सांगलें. मात हातूंत जायते जाण जखमी जाले.
नेमकें कितें घडलें?
डंपर ड्रायव्हर सोरो पियेल्लो. ताचें नांव गजानन शंकर तोट्रे (२६, रा. नांदेड) हाचे आड मनीस वधाचो गुन्यांव नोंद केला. ही अपघाताची घडणूक रातच्या सुमार बारा ते एक वरांचेर घडली. जखमी कामगारांचेर सध्या ससून हॉस्पिलांत उपचार सुरू आसात. तिगांची भलायकी हुस्को करपा सारकी आसा. ह्या अपघातांत मरण आयिल्ल्यांचीं नांवां विशाल विनोद पवार (२२), वैभवी रितेश पवार (१) आनी वैभव रितेश पवार (२) अशीं आसात. जाल्यार जानकी दिनेश पवार (२१), रिनिशा विनोद पवार (१८), रोशन शशादू भोसले (९), नगेश निवृत्ती पवार (२७), दर्शन संजय वैराळ (१८), आलिशा विनोद पवार (४७) अशीं जखमी जाल्ल्यांचीं नांवां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
