भांगरभूंय | प्रतिनिधी
पुणे, खबरां संस्था ः पुणे पुलिसांच्या गुन्यांव फांट्यान बुधवारा सकाळीं 5 ते 11 वरां मजगतीं 14 सुवातीनी धाड घालून नायजेरियन कडल्यान 47 लाखांचें एमडी जप्त केलां. फुरसुंगी, येवलेवाडी, उंड्री, पिसोळी, मांजरी, वानवडी आनी कोंढवा वाठारांनी ही धाड घाली. 17 नायजेरियन ड्रग्स वेपाऱ्यांक अटक केल्या. 5 सुवातींनी घरांत एमडी मेळ्ळे.
तशेंच आयडोफो फेबिन येनेड्यू (पिसोळी), ओलामाइड ख्रिस्तोफर कायोदे (येवलेवाडी, कोंढवा), कोहिंदे सोदीक इद्रिस (गोपाळपट्टी, मांजरी), इमॅन्युअल नवातू (उंड्री, वडाचीवाडी) हांका अटक करुन तांचे कडल्यान 35 लाखांचो म्हाल जप्त केलो. तशेंच हांगा 11 परकी नागरिक बेकायदेशीर रितीन रावतात अशें दिसून आयलें. तातूंतले आयडोफो, ओलामाइड, कोहिंदे, जाहिटी, इमॅन्युअल हे ड्रग्स तस्कर आसात. कोथरूड वाठारांतल्यान इर्शाद खान, इक्बाल खान (रा. नयानगर, मीरा रोड) हांकां अटक करून तांच्या कडल्यान 12 लाखांचे ड्रग्स जप्त केलां. मजगतीं, हालींच पुलिसांनी पुणें, दिल्ली आनी सांगली हांगा कारवाय करून 3700 कोटींचें ड्रग्स जप्त केल्ले.
भुसावळ राश्ट्रीय म्हामार्गा वयल्या हॉटेल मधुबन लागसार मंगळारा रातीं पुलिसांनी धाड घालून 73 लाखांचें 917 ग्राम एमडी ड्रग्ज जप्त केल्यांत. ह्या प्रकरणांत तिगांक अटक केल्या.
चड म्हायती प्रमाण, शारांत ड्रग्सांची विक्री जाता अशी म्हायती पुलिसांक मेळ्ळी. ते प्रमाण चवकशी केली ते वेळार म्हामार्गा वयल्या हॉटेल मधुबन लागसार दोग जाण ड्रग्स विकतात अशें कळ्ळें. मंगळारा रातीं हॉटेल मधुबन भायर पुलिसांनी सांपळो रचलो. तेन्ना कुणाल भरत तिवारी (30, तापीनगर, भूसावळ) आनी जोसेफ जॉन वालदारीस (28, रामायणनगर, भुसावळ) हांकां अटक केली. तांचे कडल्या बँगांनी धवो पिठो आशिल्ल्यो पोतयो मेळ्ळ्यो. दोगांय दुबावितांक रातीं मार्केट पुलीस स्टेशनांत हाडून चवकशी केली. तेन्ना तांणी दिपेश मुकेश मालवीय (31, जैन लाल मंदिर, भुसावळ) हांणी हो पिठो विकपाक दिल्याचे सांगलें. पुलिसांनी ताचो पत्तो घेवन रातच्या वेळार दिपेशाक ताच्या घरांतल्यान ताब्यांत घेतलो. फुडलो तपास सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
