भांगरभूंय | प्रतिनिधी
पुणे, खबरां संस्था: स्वारगेट बसस्टँड वाठारांतल्या लैंगीक अत्याचार प्रकरणांतल्या आरोपीक निमाणें पुलिसांनी अटक केली. गुनाट- शिरुर गांवांतल्यान ताका अटक केली. दत्तात्रेय गाडे अशें ताचें नांव.
स्वारगेट बस स्टॅण्डार तरणाटेचेर लैंगीक अत्याचार केले उपरांत तो गुणाट ह्या गांवांत गेल्ल्याचें मुखार आयलें. तो शेतांत लिपून बसला अशेंय पुलिसांक कळ्ळें. ते नदरेन पुलिसांचो पंगड आनी ड्रोनचे मजतीन ताचो सोद घेताले. निमाणो शुक्रारा सकाळीं तो सांपडलो. .
दोनदां बलात्कार
स्वारगेट बसस्टॅण्डांत २६ वर्सां पिरायेचे तरणाटेचेर बलात्कार जाल्ल्याची घडणूक बुधवारा घडली. हे विशीं पुलिसांनी चवकशी सुरू केली. मजगतीं, पिडेस्त तरणाटेचो मेडिकल अहवाल मुखार आयलो. हातूंत धक्को दिवपी म्हायती उक्ती जाली. पिडेस्त तरणाटेचेर एकदां न्हय तर दोन फावटीं लैंगीक अत्त्याचार जाल्ल्याचें अहवालांतल्यान मुखार आयलें. हे घडणुकेक लागून पुण्यांत बरोच बोवाळ निर्माण जाला.
पुलिसांनी सांगलें, आरोपीन पिडेस्त तरणाटेक म्हणलें, ताई खंय वता? ताचेर चलयेन आपल्याक फलटणाक वचपाचें आसा अशें सांगलें. उपरांत आरोपीन म्हणलें, सातारची बस हांगा रावना. ती थंय रावल्या. तरणाटेन म्हणलें, बस हांगाच लागता म्हणून हांव हांगा बसलां.
हाचेर आरोपीन मुखार म्हणलें, बस थंयसर येवन रावल्या. चल हांव तुका थंय घेवन वतां. उपरांत ती तरणाटे ताचे वांगडा गेली. बसींत काळोख आसा तें पळोवन तरणाटेन ताका विचारलें, बसींत काळोख आसा. ताचेर ताणें जाप दिली, ही रातची उसरां वचपी बस. लोक न्हिदल्यात. हाका लागून लायट बंद आसा.’ उपरांत पिडेस्त तरणाटेन मोबायलाची लायट लावपाचो यत्न केलो. तो मेरेन आरोपीन तिचे फाटल्यान बसींत चडून बसीचें दार बंद केलें. उपरांत ताणें बलात्कार केलो.
गृह राज्यमंत्री योगेश कदम हांणी सांगले, स्वारगेट एसटी स्टँडार जी घडणूक घडली तातूंत कसलेच तरेचो स्ट्रगल वा फोर्सफुली कृती जावंक ना. ही घडणूक घडली तेन्ना शिवशाही बसी आशिकुशीक १० ते १५ जाण आशिल्ले. मात तरणाटेन विरोध करूंक नाशिल्ल्यान कोणाकूच दुबाव येवंक ना. आतां दुबावीता कडल्यान आनीक कांय गजाली स्पश्ट जातल्यो.
दुबावितान झटपट पयशे जोडपाच्या नादांत चोरी आनी लुटमारी सारके प्रकार केल्ल्याचें समजता. ताका राजकारणाचीय आवड आशिल्ली. तांतल्यान तांणी वेंचणूक लढली. मात तो हारलो अश्या विंगड विंगड गजाली मुखार आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
