भांगरभूंय | प्रतिनिधी
नाशिक, खबरां संस्था ः पुणे- नाशिक म्हामार्गाचेर नारायण गांवा लागसार भिरांकूळ अपघात जालो. तातूंत आयचर टेम्पो आनी एसटी हांचे मदीं सांपडिल्ले मॅक्सिमो गाडीचें व्हड लुकसाण जालें. ह्या अपघातांत 9 जाणांक मरण आयिल्ल्याची म्हायती मेळ्ळ्या. जाल्यार जखमीं उपचारा खातीर हॉस्पिटलांत व्हेल्यात. मरण आयिल्ल्यांचो आंकडो आनीक वाडपाची शक्यताय आसा.
नाशिक – पुणे म्हामार्गाचेर आयचर टेम्पो, प्रवाशांक व्हरपी मॅक्सिमो गाडी आनी एसटी हांचे मदीं हो भिरांकूळ अपघात जालो. आयचर टेम्पो ओव्हरटेक करपाचो यत्न करतना ताचो धपको मॅक्सिमो गाडयेक बसलो अशें लोकांनी सांगलें. मॅक्सिमो प्रवासी गाडी पुणे-नाशिक म्हामार्गाचेर वतना एसटीच्या फाटल्यान वताली. ताचे फाटल्यान आयचर टेंपो. तिणें धपको दिल्ल्यान मॅक्सिमो गाडी बशीक आपटली. दोनूय गाडयां मदीं मॅक्सिमो गाडी पुरायपणान मोडली. गाडयेंतले सगले 11 प्रवासी गंभीर जखमी जाले. हांतूतल्या 9 जाणांक मरण आयलें जाल्यार जखमींचेर उपचार सुरु आसात.
मरण आयिल्ल्यांच्या लागींच्यांक अर्थीक मजत : फडणवीस
हे संबंदी मुख्यमंत्री देवेंद्र फडणवीस हांणीय ही घडणूक दुर्दैवी आसा अशें म्हणलां. तशेंच मरण आयिल्ल्यांच्या वारसदारांक मुख्यमंत्री सहायता निधींतल्यान अर्थीक मजत दिवपाचीय घोशणा तांणी केल्या. तांकां मुख्यमंत्री मदत निधींतल्यान पांच लाख रुपया अर्थीक मजत दितलें अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
