भांगरभूंय | प्रतिनिधी
उरुळी कांचन, खबरां संस्था: पुणेच्यान एक धक्को दिवपी बातमी मुखार आयल्या. पुणे जिल्ह्यांतल्या उरुळी कांचन गांवांत गॅसीन भरिल्लो सिलींडर रेल्वेच्या रुळार दवरून घातपात घडोवन हाडपाचो यत्न केल्लो. लोको पायलटाच्या शिटूकपणाक लागून व्हड अपघात जावपाचो वाटवलो. हे विशीं पुलिसांनी अनवळखी मनशा आड गुन्यांव दाखल केला. ही घडणूक आयतारा रातची पावणे इकरांक घडली.
मजगतीं, रेल्वे आनी रेल्वे पुलिसांच्या वरिश्ठ अधिकार्यांनी घडणुके सुवातेर भेट दिवन तपासाच्या आनी सुरक्षिततायेचे नदरेन सुचवण्यो केल्यो. हे विशीं रेल्वेचे लोको पायलट शरद शहाजी वाळके (३८) हांणी कागाळ केल्या.
पुलिसांनी दिल्ले म्हायती प्रमाण, लोको पायलट वाळके हे सदां भशेन आयतारा रातीं हद्दींतल्या रेल्वे मार्गाची पळोवणी करताले. ताका रातच्या सुमार पावणे इकरांक उरूळी कांचनचे हद्दींत पुण्याक वचपी रेल्वे रुळार (रेल्वे विद्युत पोल किलोमीटर नंबर २१९/७-५) प्रिया गोल्ड कंपनी गॅसीचो सिलींडर दिसलो.
तांणी तो सिलेंडर उखलपाचो यत्न केलो तेन्ना त्या सिलींडरांत गॅस (३९०० किं ग्रॅम वजन) आशिल्ल्याचें लक्षांत आयलें. तेन्ना वाळके हांणी तो सिलेंडर रेल्वे रुळा पसून पयस व्हेलो आनी हो अनवळखी मनशाचो घातपाताचो यत्न आशिल्ल्याचें कळ्ळें.
शरद वाळके हांणी हे विशींची म्हायती रोखडीच पुलिसांक आनी वरिश्टांक दिली. ते प्रमाण उरूळी कांचन पुलिसांनी रेल्वेच्या कलम १५०, १५२ प्रमाण अनवळखी मनशाचेर घातपात घडोवपाचो यत्न केल्ले खातीर गुन्यांव नोंद केला. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
