भांगरभूंय | प्रतिनिधी
पुणे, खबरां संस्था: पुण्यांतल्या कल्याणी नगर जंक्शन भागांत आयतारा सकाळीं नंबरप्लेट नाशिल्ले पोर्शे गाडयेन मोटरसायकलीक धपको दिल्लो. हातूंत दुचाकींत वचपी दोगांक जाग्यारूच मरण आयिल्लें. ह्या प्रकरणांत आतां पुणें पुलिसांनी व्हड कारवाय केल्या. पलिसांनी नेण्ट्या चल्याचो बापूय विशाल अग्रवाल हांकां छत्रपती संभाजीनगर हांगच्यान अटक केल्या.
ह्या प्रकरणांत आरोपी नेण्टे पिरायेचो आशिल्ल्यान सोमारा ताचो बापूय विशाल अग्रवाल हांचे आड गुन्यांव दाखल केल्लो. मात, तेन्ना सावन ते फरारी आशिल्ले. पुलीस तांचो सोद घेताले. हाचे मजगतीं आयज सकाळीं तांकां छत्रपती संभाजीनगर भागांतल्यान अटक केली.
आयतारा सकाळीं जाल्ल्या ह्या अपघातांत पुलिसांनी दुबाविताक ताब्यांत घेतिल्लो. उपरांत आयतारा दनपरां विशेश हॉलिडे कोर्टांत हजर केल्लो. ताका पुलीस स्टेशनांत धाडचो. तशेंच आरोप साडेसतरा वर्सां पिरायेचो आशिल्ल्यान ताका प्रौढ समजून खटलो चलोवचो, अशी मागणी केल्ली. मात न्यायालयान ही मागणी फाटीं घेवन ताका जामीन मंजूर केल्लो. तशेंच अपघाताचेर ३०० शब्दांचो निबंध बरोवचो, अशे आदेश दिल्ले.
हे विशीं पुण्याचे पुलीस आयुक्त अमितेश कुमार हांणी आरोपीचेर कायद्या प्रमाण कारवाय करता. कल्याणीनगर भागांत घडिल्ली घडणूक सामकी वायट जावन आसा. ह्या प्रकरणांत अटक केल्लो आरोपी सोरो पिवन गाडी चलयतालो. हें स्पश्ट जालां. हे विशीं आमी पब धनी, दुबाविताचो बापूय आनी नंबर प्लेटी बगर गाडी दिवपी शो रूमच्या धनयाचेर गुन्यांव दाखल केला. तशेंच दुबावित कागदपत्रांच्या आधारान नेण्टे पिरायेचो आशिल्ल्याचें कळ्ळें. ताका लागून ताका न्यायालयान कांय अटी घालून जामीन दिला. मात हो भुरगो खरेंच नेण्टो? हे विशींचो तपास आमची टीम शाळेंत वचून करता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
