भांगरभूंय | प्रतिनिधी
म्हापशेंः कोथरूड पुण्यांत रंगकाम करतना एका घरांतल्यान चार लाखांची दोन भांगराची काकणा चोरून गोंयांत पळून आयिल्ल्या प्रमोद शिंदे (कोथरूड, पुणें) हाका म्हापशें पुलिसांनी अटक केल्या. ह्या कामगिरी खातीर पुणें पुलिसांनी गोंय पुलिसांची तोखणाय केल्या.
ही चोरयेची घडणूक 28 जुलयाक घडली. हे संबंदी पुणें शार पुलिशेंत गुन्यांव नोंद केल्लो. कागाळदार कुटुंबान आपलें घर रंगोवपाची जापसालदारकी वेवसायान पेंटर आशिल्ल्या दुबावीताचेर सोंपयिल्ली. ही संद घेवन दुबावितान घराच्या बॅड रूमांतली आलमारी उगडून 2 भांगराचीं कांकणां चोरून व्हेलीं. ह्या कांकणांची किंमत 4 लाख रुपया आशिल्ली. चोरी जाले उपरांत दुबावितान रंगोवपाचें काम अर्दें सोडून पळून गेल्लो. ही चोरयेची घडणूक नदरेक आयली तेन्ना कागाळदार कुटुंबान शार पुलिशेंत कागाळ केल्ली.
पुलीस तपासांत दुबावीत पुणें- गोंय बशींतल्यान गोंयांत पळून गेल्ल्याचें कळ्ळें. पुणें पुलिसांनी रोखडोच गोंय पुलिसां कडेन संपर्क सादलो आनी म्हापशें पुलिसांक खबर दिली. ही बस म्हापशें आंतरराज्य बस स्टँडार पावतकच पुलिसांनी दुबाविताक धरून पुणें पुलिसांक म्हायती दिली. दुबाविता कडेन 2 लाख रुपयांचे चोरयेचें एक कांकण मेळ्ळें. ते उपरांत पुणे पुलिसांनी म्हापशें पुलीस स्टेशनांत येवन दुबाविताक अटक केली आनी ताका ट्रांझिट रिमांडाचेर घेवन गेले.
गोंय पुलीसांचे हे कामगिरी खातीर पुणें पुलिसांनी उत्तर गोंयचे पुलीस अधीक्षक राहुल गुप्ता, म्हापशें पुलीस निरिक्षक निखिल पालेकर, उपनिरिक्षक विशाल मांद्रेकार, कॉन्सटेबल राजेश कांदोळकार आनी महेंद्र मांद्रेकार हांची तोखणाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
