पुणें : वैष्णवीची आत्महत्या काय खून?

भांगरभूंय | प्रतिनिधी

फरारी माव, देराक स्वारगेट वाठारांत अटक

पुणेः पिंपरी- चिंचवडच्या वैष्णवी हगवणे हिच्या मरण प्रकरणांत तिचो फरारी माव राजेंद्र हगवणे आनी देर सुशील हगवणे हांकां स्वारगेट हांगा पुलिसांनी काल अटक केली. अटक करतना राजेंद्र हाका ‘पश्चाताप जालां काय’ अशें पत्रकारांनी विचारलें तेन्ना तांणी हात आनी मान हालोवन ना अशें सांगलें. वैष्णवीच्या मरणा उपरांत हे दोगूय तळेगांवांतल्या एका धाब्यार मटन खातना सीसीटीव्ही कॅमेऱ्यांत दिसले, उपरांत पुण्यांतल्यान कोल्हापूर आनी परत पुणे प्रवास केलो. ह्या वेळार तांकां अटक केली. ह्या बापूय- पुताक 5 दीस पुलीस कोठी दिल्या. वैष्णवीक 9 म्हयन्यांचें भुरगें आसा.
हाचे आदीं राजेंद्र हगवणेची बायल लता, धूव करिश्मा आनी वैष्णवीचो घोव शशांक हांकां अटक जाल्या. राजेंद्र हो व्हडलो पूत सुशीला सयत फरारी आशिल्लो. हगवणे घराण्याचो संबंद वरिश्ठ राजकी फुडाऱ्यां कडेन आसा. पूण हे घडणुके उपरांत सगल्या पक्षांनी आनी फुडाऱ्यांनी हगवणे कुटुंबाक खर ख्यास्त दिवची, अशी भुमिका घेतल्या.

नेमकें प्रकरण कितें?
मुळशी तालुक्यांतल्या एका गांवच्या राष्ट्रवादी काँग्रेस समितीचो आदलो पदाधिकारी राजेंद्र हगवणेची धाकटी सून वैष्णवी हिणें 16 मे दिसा घरांत गोळ घेवन आत्महत्या केल्याची घडणुक उजवाडाक आयली. पूण पोस्टमॉर्टम अहवालांत तिच्या आंगाचेर घावे, खरचटिल्ल्याचे दाग, वळ दिसून आयले, ताका लागून ही आत्महत्या न्हय तर हुंड्या खातीर खून अशी शक्यताय लोकांनी उक्तायल्या. वैष्णवीचो बापूय अनिल कस्पटे हांणी तिच्या घोवाच्या कुटुंबाचेर गंभीर आरोप केल्यात. तांच्या मतान ताचे चलयेक लग्नांत 51 तोळे भांगर, रुपें आनी वीस लाखांची फॉर्च्यूनर गाडी दिल्या उपरांत लेगीत ते सेगीत त्रास दिताले. देखून हे मरण फकत आत्महत्या न्हय तर खून असो दावो तांणी केलो.

मोगान जाल्लें लग्न
वैष्णवी आनी शशांक हगवणे हांचे दोन वर्सां आदीं मोगान लग्न जाल्लें. ह्या लग्नाक अजित पवार, सुप्रिया सुळे आनी हेर राजकी फुडारी आयिल्ले. पूण लग्न जाले उपरांत फकत दोन म्हयन्यां भितर घोवागेल्यानी तिका त्रास दिवपाक सुरवात केली. माव राजेंद्र, माय लता, नणंद करिश्मा, दीर सुशील आनी घोव शशांक हांणी वैष्णवीक मानसीक आनी शारिरीक त्रास दिलो. वैष्णवी शांत स्वभावाची आशिल्ली.
तिच्या चारित्राचेर दुबाव घेवप, तिका मारप, तिच्या आंगाचेर थुकप, कुळारा पयशे आनी भांगरा वस्ती मागपाक लावप अशें जायते प्रकार तिचे सवे घडले. गुरवार आसतना तिणें विख घेवन आत्महत्या करपाचो यत्न केलो, पूण वेळार मजत मेळिल्ल्यान ती वाटावली. पूण ते उपरांत लेगीत तिचो त्रास थांबलो ना.

2 कोटीची मागणी आनी मरण
कांय दिसां आदीं वैष्णवीचो घोव शशांकान तिच्या बापाय कडेन प्लॉट घेवपाक 2 कोटी मागले. ताणें ही रक्कम दिवपाक न्हयकार दिले उपरांत वैष्णवीचेर परतून अत्याचार सुरु जालें. आनी मागीर तिच्या आत्महत्याची खबर आयली. तिच्या बापायन तिच्या आंगाचेर जाल्ले घावे पळोवन विचारलें, तिच्या आंगाचेर इतले घावे कित्याक? हाचेर शशांकान जाप दिली, “आमकां पयशे जाय. तुजे धुवेक फुकट पोसपाची कितें? देखूनच आमी तिका मारली.”

भुरग्याक घेतलो ताब्यात
वैष्णवीच्या मरणा उपरांत तिचें णव म्हयन्यांचें भुरगें पुण्यांतल्या कर्वेनगरांत रावपी नीलेश चव्हाण हाचे कडेन आशिल्लें. वैष्णवीचे आवय-बापूय भुरग्याक हाडपाक गेल्ले तेन्ना निलेशान तांकां बंदूक दाखोवन धांवडावन घाल्ले. निमाणें पुलिसांक लागून भुरग्याक वैष्णवीच्या कुटुंबा कडेन म्हणल्यार कस्पटे कुटुंबाच्या ताब्यांत दिला. तांणी निलेश चव्हाणा आड कागाळ दाखल केल्या.
निलेश हो वैष्णवीची नणंद करिश्माचो इश्ट. तो जामिनाचेर भायर आसा आनी ताचेर बायलेक त्रास दिवपाचो आनी तिचे अश्लील व्हिडियो रेकॉर्ड करपाचो आरोप आसा.

व्हडले सुनेचो आरोप
राजेंद्र हगवणेची व्हडली सुन मयूरी हिणें प्रसार माध्यमां मुखार धक्को दिवपी आरोप केले. पयशां खातीर मावा कडल्यानय तिका त्रास जाताले अशें तिणें स्पश्ट केलें. तिचो घोव सुशीलान तिची बाजू घेवपाचो यत्न केलो तेन्ना ताका लेगीत कुटुंबाच्या चेपणाक तोंड दिवचें पडलें. तिच्या घोवाचे गैरहजेरेंत तिची माय, माव, नणंद आनी देरान तिचेर हात उबारले. मयुरीच्या म्हणण्या प्रमाण, राजेंद्र आनी शशांकान तिचे कपडे पिंजले आनी भुरगे जायना म्हूण गाळी संवल्यो. हे भिरांकूळ अवस्थेंत तिका घरांतल्यान पळून वच्चें पडलें. तिणें मागीर पुलिशेंत कागाळ केली, पूण फकत एनसी नोंद जाल्ली आनी कागाळ फाटीं घेवपाचोय तिचेर दबाव आयलो.